Հարավկորեական Չհոնջու քաղաքում կայացած սամբոյի աշխարհի առաջնությունից սպասելիքները մեծ էին հատկապես մեր տիտղոսակիր մարզիկներից՝ Տիգրան Կիրակոսյանից ու Գրիգոր Մխիթարյանից, որոնք նախկինում նվաճել էին աշխարհի չեմպիոնի կոչումը, սակայն Հարավային Կորեայում չկարողացան կրկնել հաջողությունը: Sputnik Արմենիա ռադիոկայանի եթերում այս մասին ասաց Հայաստանի սամբոյի ազգային հավաքականի գլխավոր մարզիչ, ՀՀ վաստակավոր մարզիչ Վովիկ Խոջայանը։
«Տիգրանի մոտ առավել գեղեցիկ ստացվեց ադրբեջանցու հետ գոտեմարտը 1/8-րդ եզրափակիչում, երբ մեր մարզիկն առավելության հասավ մրցակցի նկատմամբ: Ընդ որում՝ ադրբեջանցու կողմից ագրեսիվություն կամ կոպտություն չնկատվեց: Ի դեպ, վերջին միջադեպից հետո, երբ մրցաշարերից մեկում ադրբեջանցի սամբիստը պատվո պատվանդանին չոքել էր, չէր կանգնել մեր օրհներգի ժամանակ ու որակազրկվել էր, դրանից հետո նրանք դասեր են քաղել: Առհասարակ մենք՝ մարզիչներս, իրար շատ լավ ճանաչում ենք, և մեր ու մեր սաների միջև այժմ լարվածություն չկա»,- նշեց նա:
Գլխավոր մարզչի կարծիքով՝ մեր մարզիկների ձախողման հիմնական պատճառն այն էր, որ նրանք ադապտացիայի և մրցաշարին տեղում նախապատրաստվելու համար անհրաժեշտ ժամանակ չունեցան: Հարավային Կորեա հասան երկարատև, հոգնեցուցիչ չվերթից հետո, մրցավայր ժամանեցին ուշ երեկոյան և առավոտյան արդեն մտան մրցագորգ:
Հայաստանը սխալվեց աքլորի ու կանանց պատճառով. Ուտկինը` Գրիգորյանից հրաժարվելու մասին
Հիշեցնենք, որ Հարավային Կորեայում տեղի ունեցած սամբոյի աշխարհի առաջնությունում Հայաստանն ուներ 11 պատվիրակ, որոնցից Դավիթ Գրիգորյանը 82կգ քաշային կարգում նվաճեց բրոնզե մեդալ: Մեր սամբիստներն ընթացիկ տարում տարբեր մրցաշարերի մասնակցելով՝ ընդհանուր առմամբ նվաճել են 32 մեդալ (4 ոսկե, 13 արծաթե, 18 բրոնզե):
