ՀՀ վարչապետ Նիկոլ Փաշինյանն ընտանիքի հետ Հայաստանի տեսարժան վայրերը բացահայտելու առիթը բաց չի թողնում։ Facebook-ի իր էջում վարչապետը հրապարակել է «Ճանաչենք Հայաստանը նորովի» շարքի հերթական տեսանյութը։ Այս անգամ Փաշինյանների ընտանիքը Լոռիում է, ավելի կոնկրետ՝ Լոռվա բերդում։
Տեսանյութում Փաշինյանը պատմական տվյալներ է ներկայացնում երբեմնի Տաշիր-Ձորագետի Կյուրիկյան թագավորության արքայանիստ ոստան համարվող բերդի մասին։ Նա շրջում է բերդի տարածքում՝ ցուցադրելով պատմական կառույցի պահպանված հատվածները, բաղնիքը, եկեղեցին ու նաև բերդից բացվող հիանալի տեսարանը։
«Ի տարբերություն իմ նախորդ այցելած բերդերի՝ այստեղ մեքենան մինչև դարպասի մոտ գալիս է։ Այնպես որ շատ հեշտ է այստեղ հասնելը»,- զբոսաշրջիկների համար նաև կիրառական նշանակություն ունեցող օգտակար տվյալներ է հաղորդում վարչապետն ու ավելացնում՝ եթե կան մարդիկ, որոնք դեռ չեն տեսել բերդն, անպայման այցելեն։
Վարչապետը շտապում է տեղեկացնել, որ արգելոցի մուտքը վճարովի է և ցուցադրում տոմսը, որի վրա նշված է տոմսի արժեքը՝ 650 դրամ։
Հիշեցնենք՝ երեկ՝ սեպտեմբերի 3-ին, Փաշինյանը ևս մեկ տեսանյութ էր հրապարակել «Ճանաչենք Հայաստանը նորովի» շարքից։ Այդ տեսանյութում վարչապետը ներկայացրել էր Տավուշի մարզի «Աղջկա բերդ» տանող դժվարամատչելի ճանապարհի մասին։
Նիկոլ Փաշինյանը արձակուրդում կլինի մինչև սեպտեմբերի 4-ը։ Այդ ընթացքում նրան կփոխարինի փոխվարչապետ Տիգրան Ավինյանը:
