ՀՀ քննչական կոմիտեն հրապարակել է Արցախում գերեվարված Սիրիայի քաղաքացի Մուհռաբ Մուհամադ Ալ Շխերի հարցաքննությունից մեկ հատված: Ալ Շխերը 45 տարեկան է, ծնվել է Սիրիայի Համմա նահանգի Թոթհա գյուղում։ Ունի 4-ամյա կրթություն, ամուսնացած է, ունի երեք երեխա` 9, 12, 14 տարեկան։ Սիրիայում ժամկետային զինծառայություն է անցել, ունեցել է դատվածություն` անզգուշությամբ հրացանով կրտսեր եղբորը սպանելու համար, աշխատել է որպես բանվոր։
Հոգեմետ դեղերի ազդեցության տակ են. վարձկանների ներկայությունն ապացուցող տեսանյութ
«Հոկտեմբերին իմ հարևան Հուսեյնն ասաց, որ գնում է միանալու «Սուլեյման Շահ» խմբավորմանը, որը տղամարդկանց էր հավաքագրում` մարտական գործողությունների մասնակցելու համար, և վճարելու են ամսական 2000 դոլար։ Ես ասացի, որ նույնպես ուզում եմ միանալ այդ խմբավորմանը։ Միասին գնացինք գրանցվելու։ Խմբավորումը ղեկավարող գնդապետ Մահմուդը ընտրում էր պիտանի տղամարդկանց։ 250 հոգու ընտրեցին», – պատմում է Ալ Շխերը։
Նրա խոսքով` ընտրված 250 հոգուն մարդատար և բեռնատար մեքենաներով տեղափոխել են Սիրիայի և Թուրքիայի սահման, որտեղ սահմանապահները ոչ մի հարց չեն տվել և թույլ են տվել նրանց մտնել Թուրքիա։ Ապա ահաբեկիչները հասել են թուրքական Քիլիս քաղաք, որտեղ նրանց դիմավորել են թուրք զինվորականներ։ Այդտեղ նրանց զենք են տրամադրել և ասել են, որ աշխատավարձը հենց թուրք հրամանատարներից են ստանալու` ամսվա վերջում։
«Հոկտեմբերի 18-ին մենք ինքնաթիռով թռանք Ադրբեջան, որտեղ մեզ տրվեցին ադրբեջանական համազգեստներ։ Ադրբեջանական զորքում թուրքական համազգեստով զինվորականներ կան` և շարքայիններ, և հրամանատարներ։ Ես սիրիացի կամ արաբ մոտ 430 հոգի եմ տեսել, նրանց մի մասը Իդլիբ քաղաքից էր», – պատմում է ահաբեկիչը։
Հոկտեմբերի 19-ին երկու ադրբեջանցի հրամատարի ուղեկցությամբ 200 հոգանոց սիրիացիները խումբը սպիտակ պիկապ մեքենաներով շարժվել է Արցախի ուղղությամբ։
Վարձկաններին հակամարտության գոտի տեղափոխելու ապացույցներն անհերքելի են. ՀՀ արտգործնախարար
«Մեզ ասացին, որ հայկական գյուղի ուղղությամբ ենք գնում, որը պետք է գրավենք։ Ավելացրին, որ պետք է բոլորին սպանել` զինվորական լինեն, թե քաղաքացիական։ Հրամանատարներից մեկն ասաց` ով վախենում է կամ սրտից թույլ է, թող հաբեր խմի։ Ովքեր խմում էին այդ հաբերը, ոչ մի վախ չէին զգում։ Մենք ձորով իջանք դեպի հայկական գյուղը։ Արդեն ճանապարհին մենակ էինք` ադրբեջանցիները մեզ հետ չէին եկել։ Ձորում մեր ուղղությամբ սկսեցին կրակել. հայերն էին։ Մոտ 70 հոգի սպանվեց կամ վիրավորվեց։ Ես էլ վիրավորվեցի ձեռքից և ոտքից։ Ինձ ոչ մեկը չօգնեց, ով կենդանի էր մնացել, թողեց և փախավ», – պատմում է Ալ Շխերը։
Ահաբեկչի խոսքով` ինքն այդպես էլ չի ստացել իր աշխատավարձը։ Վերջում նա կոչ արեց բոլոր սիրիացիներին` չմասնակցել օտար երկրների պատերազմներին և արդար աշխատանքով վաստակել իրենց գումարը։
«Իմ երեք անչափահաս երեխաները ու կինս մենակ են մնացել, հիմա երբ ես չկամ, չգիտեմ` ով է նրանց ապահովելու։ Ես անարդար ճանապարհով էի ուզում գումար աշխատել և ծուղակն ընկա։ Չեմ ուզում` մարդիկ իմ սխալը կրկնեն։ Թող լքեն օտար երկրները, քանի ուշ չէ», – ասում է Ալ Շխերը։
Ալ Շխերը ձերբակալվել է ՀՀ քրեական օրենսգրքի երեք հոդվածներով նախատեսված հանցանքներ կատարելու կասկածանքով, մասնավորապես` 389-րդ հոդվածով (միջազգային ահաբեկչությունը), 390-րդ հոդվածի 1-ին մասի 1-ին կետով (միջազգային մարդասիրական իրավունքի նորմերի լուրջ խախտումները զինված ընդհարումների ժամանակ) և 395-րդ հոդվածի 3-րդ մասով (վարձկանությունը)։
Արցախի դեմ սանձազերծած պատերազմի առաջին իսկ օրերից հայտնի դարձավ, որ Թուրքիան Սիրիայի հյուսիսից վարձկաններ է ուղարկել Ադրբեջան՝ Արցախի ու Հայաստանի դեմ օգտագործելու նպատակով։ Այս տեղեկությունները հաստատել էր նաև ՌԴ Արտաքին հետախուզական ծառայության պետ Սերգեյ Նարիշկինը:
ՌԻԱ Նովոստին էլ տեղեկացրել է, որ հոկտեմբերի 16-ին ավելի քան 1000 գրոհային է տեղափոխվել ղարաբաղյան հակամարտության գոտի։
Ձերբակալվել է Արցախի դեմ կռվող ահաբեկչական խմբավորման անդամներից մեկը
Հայտնի է, որ սիրիացի ահաբեկիչներին 1,5-2 հազար դոլար են խոստանում ռազմական գործողություններին մասնակցելու համար։ Այս տեղեկությունը հաստատել են ոչ միայն հայաստանյան և ղարաբաղյան իշխանությունները, միջազգային ԶԼՄ-ներն ու արտասահմանյան իրավապաշտպան կազմակերպությունները, այլև Սիրիայի, Ֆրանսիայի, Ռուսաստանի, ԱՄՆ–ի և այլ երկրների իշխանությունների ներկայացուցիչներ։
Թուրքիան Հարավային Կովկասը լցրել է ահաբեկիչներով. ՀՀ ԱԳ նախարարի հարցազրույցը
