Արցախի պաշտպանության բանակը տեսանյութի միջոցով է ապացուցել հարավարևելյան ճակատային գծում (Շեխեր-Կարմիր շուկա-Թաղավարդ բնագիծ) թշնամական ահաբեկչական խմբավորումների, հատուկ նշանակության ստորաբաժանումների, զրահապատ ավտոշարասյան ոչնչացումը։
Ավելի վաղ ՊՆ–ն հաղորդագրություն էր տարածել` ասելով, որ ՊԲ-ի ուժերն ու կամավորականները հակառակորդի համար իսկական «դժոխք» են կազմակերպել մեր անտառներում ու ձորերում: Նշված տեղեկատվությունը հակառակորդի քարոզչամեքենան, ինչպես միշտ, փորձել էր հերքել:
Որպես ապացույց ՊԲ հրապարակած տեսանյութում գործողության մասնակիցներից մեկը պատմում է, որ Թաղավարդ գյուղի տղաներով հասել են դեպքի վայր ու հետևից ականանետով հարվածել թշնամու շարասյանը։
«Մի տեխնիկան վառվել է, մեջը զոհ են թողել, մի քանիսն էլ փախել են, բայց կրակել ենք, ու վերևն ընկած են։ Երկու մեքենա էլ տղաներն են էլի կրակել։ Նման մեքենաներով մեզ վրա հարձակվող ահաբեկիչներից մենակ «Ալլահ աքբարն» ենք հասկանում»,–պատմում է զինվորականը։
ԱՀ ԱԱԾ տնօրենը գեներալ-մայորի ուսադիրները մարտական դիրքում է հանձնել Նորայր Միրզոյանին
Մեկ ուրիշն էլ հավելում է, որ ոչնչացված խմբավորումներում հիմնականում ընդգրկված են վարձու գրոհայիններ` արաբներ։ Նրա խոսքով` մի քանի անգամ հարձակվել են, սակայն հետ են շպրտվել։
«Տարածքին քաջատեղյակ լինելով` այնպիսի անակնկալներ ենք մատուցում թշնամուն, որ թողնում ու փախչում են»,–ասում է նա։
Հիշեցնենք, որ ՀՀ ՊՆ ներկայացուցիչ Արծրուն Հովհաննիսյանը տեղեկացրել էր, որ մարտերը Արցախի արևելյան հատվածում շարունակվում են։ Հակառակորդի զորքերը լուրջ կորուստներ են կրում։
