Սերգեյ Չամանյանի դիտարկմամբ` ոչ մոնոպոլիզացված հավաքները պետք է տեղի ունենան, քանի որ ժողովուրդն իրավունք ունի արտահայտել իր կարծիքն ու վերաբերմունքը Հայաստանում առկա իրավիճակի առթիվ։ Քանի որ իրավիճակն, ըստ նրա, իսկապես ողբերգական է, ուստի ժողովուրդն իրավունք ունի անընդմեջ բարձրաձայնել խնդիրները, դժգոհել իրավիճակից։
«Մենք բողոքական ազգ չենք, բայց բողոքել սիրում ենք։ Վերջերս ունեցանք շատ մեծ կորուստ, և այդ իրավիճակից դուրս գալու ճանապարհին որոշ մարդիկ գտնվում են բողոքի աստիճանին, իսկ շատերը` ժխտման փուլում` փորձելով իրենց վրայից թոթափել մեղքի բաժինը և ամեն ինչում մեղավոր համարել մեկ մարդու` չկիսելով նրա հետ պատասխանատվությունը։ Մարդկանց ասում ենք, որ միանան, ինչը կլինի մեղքի քավության իրենց քայլը, և սկսենք նոր էջից, ոչ թե ծալված էջը շտկենք ու ասենք, որ այդպես լավ է»,– նշեց «Մեդիապաշտպան» կազմակերպության ղեկավարը։
Չամանյանի կարծիքով` երբ Ռոբերտ Քոչարյանի նման ծանրակշիռ քաղաքական գործիչը վերադառնում է քաղաքական դաշտ, ապա դա անշուշտ առաջացնում է ոգևորություն։ Բայց նրա համար անընդունելի է այն իրողությունը, երբ Քոչարյանը պատրաստակամություն է հայտնում մասնակցել ընտրություններին Փաշինյանի կառավարության գոյության պայմաններում, որովհետև այդ կերպ փաստորեն լեգիտիմացվում է Արցախի հանձնումն Ադրբեջանին, այդ կերպ ընդունում ենք դավաճանությունն ու հակահայկական քայլերը։
«Եթե նույնիսկ այս կառավարությունը հասցնի անցկացնել արտահերթ ընտրություններ, ապա ոչ մի քաղաքական ուժ, բացի իրենցից, չպետք է մասնակցի, այլ բոյկոտի` դրանով իսկ ընտրությունները դարձնի անվավեր, ցույց տա, որ Փաշինյանն ու իր թիմը դավաճան են և անելիք չունեն ներհայաստանյան քաղաքական ասպարեզում»,– նշեց նա։
Արտահերթ ընտրություններին «Ալյանսը» կմասնակցի իր ցուցակով ու վարչապետի իր թեկնածուով
Չամանյանի տպավորությամբ` համայնքներում մարդիկ ավելի շատ են մտածում Հայաստանի մասին, քան կառավարությունն ու ազգընտիրները, որոնք այս պահին մտածում են միայն իրենց ապահովության ու ռեժիմի վերարտադրության մասին։ Նա կոչ արեց բոլոր մարդկանց, ում սիրտը ցավում է Հայաստանի համար, անկախ այն հանգամանքից, կուսակցական են, թե ոչ, փետրվարի 7-ին գալ հանրահավաքի, որը կկայանա ժամը 16։00-ին Հանրապետության հրապարակում և կլինի որպես քաղաքացիական անհնազանդության ակցիա։
