Ռուբեն Սաֆրաստյանի դիտարկմամբ` թեև Թուրքիան Արևմուտքի մաս է կազմում, մասնավորապես՝ ՆԱՏՕ–ի ռազմաքաղաքական դաշինքի անդամ է և շատ սերտ կապեր ունի արևմտյան շատ երկրների հետ, այդուհանդերձ հատկապես ԱՄՆ–ում առկա են հակաթուրքական տրամադրություններ, որովհետև այնտեղ դժգոհ են Թուրքիայի քաղաքականությունից։
«Թուրքական վերնախավն անհանգստացած է, որ մինչև հիմա տեղի չի ունեցել հեռախոսազրույց ԱՄՆ–ի և Թուրքիայի նախագահներ Բայդենի ու Էրդողանի միջև։ Թուրքական դիվանագիտությունը մեծ ջանքեր է գործադրում, որպեսզի կորզի այդ հնարավորությունը, սակայն չի ստացվում, քանի որ ամերիկացիները չեն գնում դրան»,– նշեց թուրքագետը։
Սաֆրաստյանի կարծիքով` Թուրքիան, ինչ խոսք, կարևոր դաշնակից է ԱՄՆ–ի համար, բայց վերջին շրջանում «իրեն լավ չի պահում», հետևաբար մնալով որպես դաշնակից` այդուհանդերձ պետք է պատիժ ստանա Միացյալ Նահանգների կողմից։ Ըստ նրա` Թուրքիայի դերը մեր տարածաշրջանում մեծացավ առաջին հերթին Էրդողանի քաղաքականության շնորհիվ, ինչն իրականում չի համապատասխանում Թուրքիայի հնարավորություններին։
«Թուրքիան իր առջև ավելի մեծ խնդիրներ է դնում և փորձում է լուծել դրանք, քան թույլ են տալիս իր ռեսուրսներն ու ներուժը։ Դրա համար էլ տեսնում ենք, որ գնալով ուժեղանում է Թուրքիայի քաղաքականության ռազմական բաղադրիչը և ավելի ինտենսիվ բնույթ է ստանում հատկապես այլ երկրների հետ ռազմական փոխգործակցությունը։ Բացի դրանից, աշխարհի տարբեր երկրներում տեղադրվում են թուրքական ռազմաբազաներ»,–նշեց ակադեմիկոսը։
«Թուրքիան ձգտում է գրավել Սյունիքը»․ Իրանի ԶԼՄ-ները հայտնել են տեխնիկայի կուտակման մասին
Այդուհանդերձ, Սաֆրաստյանի գնահատմամբ, Թուրքիայի վերոհիշյալ քաղաքականությունը հեռանկար չունի, որովհետև մեծ ծախսերն ու պահանջվող ահռելի ռեսուրսները վերջիվերջո կստիպեն, որ Թուրքիան ավելի զուսպ արտաքին քաղաքականություն վարի։
