«Բերնդ» ցիկլոնը Գերմանիայից տեղափոխվել է Ավստրիա։ Հորդառատ անձրևների պատճառով ջրի տակ են անցել երկրի մի քանի շրջաններ։
Kurier պարբերականը հայտնում է, որ տարերքի հետևանքով առավել լրջորեն տուժել է Զալցբուրգի դաշնային երկրամասի Հալեյն քաղաքը։ Այնտեղ ափերից դուրս է եկել Կոտբախ գետը։
Քաղաքապետ Ալեքսանդր Ստանգասինջերը հայտարարել է, որ բնակիչները պետք է լքեն աղետի գոտին։ Ավստրիայի կանցլեր Սեբաստիան Կուրցը խոստացել է աջակցություն ցուցաբերել ջրհեղեղից տուժածներին։
Տեղում վիրավորների կամ անհայտ կորածների մասին առայժմ տեղեկություններ չկան:
Նշենք, որ Արևմտյան Եվրոպայում այս օրերի ջրհեղեղը խոշորագույնն Է դարձել վերջին 20 տարվա ընթացքում։ Հեղեղվել են Գերմանիայի, Բելգիայի, Նիդեռլանդների որոշ շրջաններ։
Մասնավորապես, Գերմանիայում տարերքի զոհերի թիվն արդեն հասել է 156-ի, տուժել է 670 մարդ։
