Այս մասին Sputnik Արմենիայի «Տետ-ա-տետ» հաղորդման շրջանակներում ասում է Եկամուտների քաղաքականության և վարչարարության մեթոդաբանության վարչության պետ Օրի Ալավերդյանը:
Նրա խոսքով՝ այստեղ կար պահանջների անհամադրելիություն. տնտեսավարող սուբյեկտները որպես կանոն անտեսում էին տեխնիկական կանոնակարգով սահմանված պահանջը, և գազի վաճառքը կազմակերպվում էր խմ-ով, որպեսզի հեշտ հաշվարկելի լինեն հարկային պարտավորությունները: Ուստի Ազգային ժողովն ընդունեց նախագիծը՝ հարկային օրենսդրության և տեխնիկական կանոնակարգերի սահմանված պահանջների համադրելիության համար:
Ըստ Օրի Ալավերդյանի՝ օրենքի փոփոխությունը որևէ կերպ չի կարող ազդել գազի գնի բարձրացման վրա: Հակառակ պարագայում, ինչպես արդեն նշվեց կառավարությունում, դա կգնահատվի տնտեսավարողի կողմից որպես մանիպուլիացիոն քայլ:
«Հիմքում դրվել է շատ պարզ մեթոդաբանություն. գիտականորեն հիմնավորված գործակցով կատարվել է վերահաշվարկ, և արդյունքում, խմ-ից անցում կատարելով կգ-ի, ստացել ենք դրույքաչափ, որը 34 հզ դրամ է: Այդ դրույքաչափը հաշվարկվել է այն ձևով, որ 1 խմ գազը գիտական հաշվարկներով միջինում կշռում է 0,717 կգ կամ 717 գրամ: Մաթեմատիկական բանաձևը կիրառելուց հետո մի փոքր ավելի է ստացվել, բայց հաշվի առնելով, որ հնարավոր է տեղի ունենա հարկային բեռի ավելացում՝ մենք դրույքաչափը կլորացրել ենք դեպի վար. 1 տոննայի համար 34 հզ 867 դրամի փոխարեն սահմանելով 34 հզ դրամ»,-ընդգծում է մասնագետը:
Մասնագետը հստակեցնում է նաև, որ նախագիծը ակցիզային բեռի գծով հարկային բեռի ավելացում ընդհանրապես չի նախատեսում:
