Ֆրանսիացի ոստիկանները կկարողանան մորուք պահել և դաջվածքներ անել

ԵՐԵՎԱՆ, 9 հուլիսի — Sputnik. Ֆրանսիացի ոստիկաններին թույլ են տվել մորուք պահել և դաջվածքներ անել` նման հնարավորության վերաբերյալ բուռն բանավեճերից երկու տարի անց, գրում է ՌԻԱ Նովոստին` հղում անելով Force Ouvriere արհմիության մամուլի հաղորդագրությանը։

Ավելի վաղ Ֆրանսիայում ազգային ոստիկանության նկատմամբ գործել է 1974 թվականի կանոնը, որի համաձայն` մորուք պահել թույլատրվում էր միայն դրա անհրաժեշտությունը հաստատող բժշկական տեղեկանքի առկայության դեպքում։ Ոստիկանության աշխատողին դաջվածքն անելու թույլտվությունը ծառայության պետի լիազորության շրջանակում էր։

«Տեղերից ստացված ցանկություններով արտահայտված երկու տարվա բանակցություններից հետո ոստիկանության հետ աշխատող արհմիության ստորաբաժանումը հասել է ոստիկանների` մորուք պահելու և դաջվածք անելու թույլտվությանը», – ասվում է կոմյունիկեում։

Սակայն մորուքին և դաջվածքներին որոշակի պահանջներ են ներկայացվում։ Այսպես, դեմքի բուսականությունը պետք է խնամված լինի և չխանգարի հագուստ և զենք կրելուն, իսկ մարմնի նկարներն ու գրառումները չպետք է լինեն ռասիստական, քաղաքական, այլատյաց կամ կրոնական։