Փորձագետ. Երևանն ու Մինսկը խաղաղ ատոմի ոլորտում փորձի փոխանակում կիրականացնեն

ԵՐԵՎԱՆ, 9 հուլիսի– Sputnik. Ատոմային էներգիայի խաղաղ օգտագործման ոլորտում Բելառուսի և Հայաստանի միջև միջկառավարական համաձայնագրի ստորագրումից հետո երկու պետությունները հնարավորություն կունենան փորձի փոխանակում իրականացնել այդ ոլորտում, գրում է Sputnik–ը` հղում անելով էներգետիկայի ոլորտի բելառուսցի փորձագետներին։

Բելառուսի նախագահ Ալեքսանդր Լուկաշենկոն հավանություն է տվել ատոմային էներգիայի խաղաղ օգտագործման ոլորտում համագործակցության մասին Բելառուսի և Հայաստանի կառավարությունների միջև համաձայնագրի նախագծին և հանձնարարել է Էներգետիկայի նախարարությանը ստորագրել այդ փաստաթուղթը։

«Հայաստանի էներգահամակարգի կառուցվածքում ներառված է հայկական ԱԷԿ–ը, որը կառուցվել է ԽՍՀՄ–ի տարիներին և ապահովում է երկրում էլեկտրաէներգիայի արտադրության ողջ ծավալի մոտ մեկ երրորդը։ Բելառուսական կողմի համար օգտակար կլիներ կայանի շահագործման փորձը», – նշում են ատոմային էներգետիկայի ոլորտի փորձագետները։

Նրանց խոսքով` Բելառուսն ու Հայաստանը նաև հնարավորություն կունենան փոխանակվել ապագա բելառուսական ԱԷԿ–ի շահագործման մասին տեղեկատվությամբ։

Միաժամանակ փորձագետներն ուշադրություն են դարձրել այն փաստին, որ հայկական ԱԷԿ–ը համալրված է ВВЭР-440 տիպի (ջրային–միջուկային ռեակտոր) երկու էներգառեակտորներով։ «Այսօր Եվրամիությունը պնդում է, որպեսզի հայկական ԱԷԿ–ը կոնսերվացվի և պատրաստ է այդ նպատակով միջոցներ տրամադրել։ Եթե Երևանը համաձայնվի փակել կայանը, ապա երկրի էներգամատակարարման խնդիրը կարող է լուծել միայն նոր ԱԷԿ–ը։ Այդ պատճառով հայ գործընկերներին, անխոս, կհետաքրքրի կայանի կառուցման բելառուսական փորձը», – նշել են մասնագետները։ 

Հարավային Կովկասի միակ հայկական ԱԷԿ–ը գտնվում է Երևանից 30 կմ դեպի արևմուտք։ Հիմա աշխատում է ԱԷԿ–ի միայն երկրորդ բլոկը` 407,5 ՄՎտ հզորությամբ։