ՆՏՎ-ի գլխավոր տնօրեն Կուլիստիկովը հրաժարական կտա

ԵՐԵՎԱՆ, հուլիսի 22– Sputnik. ՆՏՎ հեռուստաալիքի գլխավոր տնօրեն Վլադիմիր Կուլիստիկովը որոշել է լքել պաշտոնը։ Այդ տեղեկատվությունը «Կոմերսանտ» թերթին հաստատել են մեդիադաշտի երեք աղբյուրները, հաղորդում է ՌԻԱ Նովոստին։

Նրանց տվյալներով` ավելի քան 10 տարի ՆՏՎ–ն գլխավորված Կուլիստիկովը որոշել է չերկարացնել իր պայմանագիրը 2016թ.–ի հունվարի 1–ից։

ՆՏՎ–ի և «Գազպրոմ մեդիայի» մամուլի ծառայություններում (մեդիահոլդինգը, որի մեջ մտնում է հեռուստաալիքը) հրաժարվել են մեկնաբանություններից։ Կրեմլում նույնպես չեն մեկնաբանել պաշտոնից հնարավոր ազատումը` նշելով, որ նախագահի աշխատակազմում բարձր են գնահատում Կուլիստիկովի պրոֆեսիոնալ հատկությունները։

ՆՏՎ–ի նոր գլխավոր տնօրենի թեկնածության հարցը դեռ որոշված չէ, գրում է հրատարակությունը։

Կուլիստոիկովն անցյալ տարվա ապրիլին Վլադիմիր Պուտինի կողմից պարգևատրվել է «Հայրենիքին մատուցած ծառայությունների համար» երկրորդ աստիճանի շքանշանով` «Ղրիմում իրադարձություններն օբյեկտիվ լուսաբանելու» համար։