17:57 20 հունվարի 2017
Ուղիղ եթեր
Саркис Григорян

Արաբագետ. Թուրքիան ԻՊ–ի դեմ լայնածավալ գործողություններ չի ծավալի

© Боон
Աշխարհ
Ստանալ կարճ հղումը
9 0 0

Արաբագետ Սարգիս Գրիգորյանը կարծում է, որ Թուրքիան կշարունակի ավիահարվածներ հասցնել ԻՊ տարածքին, բայց ցամաքային լայնածավալ գործողություններ չի սկսի։

ԵՐԵՎԱՆ, հուլիսի 27– Sputnik. Թուրքիան ծավալուն ռազմական գործողությունների չի սկսի Իսլամական պետության դեմ, Sputnik-ի թղթակցին ասաց հայ արաբագետը։

«Թուրքիան գիտակցել է, որ իր սահմանին «Իսլամական պետության» պես վտանգավոր կառույց ունենալն անթույլատրելի ճոխություն է։ Նա չի կարող հաշվի չառնել վտանգը, ուստի պետք է որոշակի գործողություններ ձեռնարկի։ Նա կշարունակի ավիահարվածներ հասցնել, բայց ցամաքային ծավալուն գործողություններ չի սկսի»,– ասաց Գրիգորյանը։

Նրա խոսքով` ՆԱՏՕ–ի անդամ երկրները շատ լավ են հասկանում, թե ինչ է իրենից ներկայացնում «Իսլամական պետությունը», և տվյալ պահին լայնածավալ ռազմական գործողություններ սկսելն արկածախնդրություն է։

Բացի այդ, Գրիգորյանի կարծիքով` Թուրքիան հասկանում է, որ ԻՊ–ն պայքար է մղում Սիրիայում իր հանդեպ թշնամաբար տրամադրված ալավիթական իշխանությունների դեմ, ինչպես նաև սպառնում է ակտիվացնել իր գործունեությունը թուրքական պետության տարածքում ակտիվ գործողությունների դեպքում։

«Իսլամական պետություն» ահաբեկչական կրոնական խմբավորումը, որը կապ ունի «Ալ Քաիդայի» հետ, սկզբում ստեղծվել և գործել է հիմնականում Սիրիայի տարածքում, որտեղ պատերազմել է կառավարական ուժերի դեմ և որտեղ ամենադաժան խմբավորումներից մեկի «համբավն» է ձեռք բերել: Մի քանի ամիս առաջ խմբավորումը կտրուկ ակտիվացրել է իր գործողություններն Իրաքում: Օգտվելով Բաղդադի իրականացրած քաղաքականության հետևանքով իրաքցի սունիթների դժգոհությունից՝ «Իսլամական պետությունը» զանգվածային գրոհ է սկսել Իրաքի հյուսիսային և հյուսիս-արևմտյան գավառների վրա և մեծ տարածքներ է գրավել:

Տարբեր գնահատականներով` ԻՊ–ի կողմից վերահսկվող տարածքը հասնում է մինչև 90 հազար քառակուսի կիլոմետրի։ Ահաբեկիչները հայտարարել են, որ  «Խալիֆայություն» են ստեղծել, որն ունի սեփական օրենքներն ու իշխանության սեփական մարմինները։ Ծայրահեղական կազմակերպության քանակի մասին տվյալները տատանվում են 50-200 հազարի միջև։

ԻՊ–ի դեմ պայքարի միասնական ճակատ չկա։ Խմբավորման դեմ պայքարում են Սիրիայի և Իրաքի կառավարական զորքերը, միջազգային կոալիցիան` ԱՄՆ–ի գլխավորությամբ, ինչպես նաև քրդերը և լիբանանյան ու իրաքյան շիիթական աշխարհազորայինները։ Մարտական գործողությունների հետևանքով հարյուր հազարավոր խաղաղ բնակիչներ և մի քանի միլիոն բնակիչներ փախստականներ են դարձել։

Գլխավոր թեմաներ