Թուրքիայի` զբոսաշրջությունից ստացված եկամուտները երկրորդ եռամսյակում նվազել են 13,8%

ԵՐԵՎԱՆ, հուլիսի 31– Sputnik. Թուրքիայում արտասահմանյան զբոսաշրջությունից ստացված եկամուտներն անցած տարվա նույն շրջանի համեմատ կրճատվել են 13,8 տոկոսով և կազմել 7,733 մլրդ դոլար, ասվում է ուրբաթ Թուրքիայի վիճակագրական գերատեսչության հաղորդագրությունում։

«Թուրքիայում զբոսաշրջությունից ստացված եկամուտներն ապրիլից հունիս ժամանակահատվածում, անցած տարվա նույն շրջանի համեմատ, կրճատվել են 13,8 տոկոսով և կազմել են 7,733 մլրդ դոլար, այդ եկամտի 86,7 տոկոսը ստացվել է արտասահմանյան զբոսաշրջիկների հաշվին, 13,3 տոկոսը` արտասահմանում բնակվող թուրքերի հաշվին։ Թուրքիայում մեկ օտարերկրյա զբոսաշրջիկի միջին ծախսերը կազմել են 719 դոլար։ Թուրքիա այցելած արտասահմանյան զբոսաշրջիկների թիվը կրճատվել է 2 տոկոսով և կազմել 10,8 մլն մարդ»,– ասվում է հաղորդագրությունում։

Միևնույն ժամանակ Թուրքիայից արտասահման մեկնող զբոսաշրջիկների թիվը երկրորդ եռամսյակում աճել է 20,6 տոկոսով, նրանց անձնական ծախսերն այդ ուղևորություններում աճել են 10 տոկոսով, նշում է գերատեսչությունը։

2014թ.–ին Թուրքիա այցելած զբոսաշրջիկների թիվն աճել է 5,6 տոկոսով 2013թ.–ի համեմատ և կազմել 41,5 մլն մարդ։ Նրանցից 35,9 մլն կազմել են օտարերկրյա զբոսաշրջկները և 5,6 մլն` մշտապես արտասահմանում բնակվող թուրքերը։

Ինչպես ավելի վաղ նշվել է Թուրքիայի մշակույթի և զբոսաշրջության նախարարության հաղորդագրությունում, այս տարի երկրի զբոսաշրջության ոլորտում խնդիրները գլխավորապես պայմանավորված են ՌԴ–ից զբոսաշրջիկների թվի նվազմամբ, որը կրճատվել է ավելի քան 27 տոկոսով; 2014թ.–ին Թուրքիա են այցելել Ռուսաստանի ավելի քան 4,38 մլն քաղաքացիներ, սակայն նոյեմբերից սկսած այդ երկրում հանգստացող ռուսների թիվը սկսել է կրճատվել` ռուբլու փոխարժեքի անկման հետ կապված։