Կուչման Մինսկ է ժամանել եռակողմ խմբի նիստին մասնակցելու համար

ԵՐԵՎԱՆ, 3 օգոստոսի — Sputnik. Ուկրաինայի նախկին նախագահ Լեոնիդ Կուչման ժամանել է Մինսկ Ուկրաինայի եռակողմ խմբի նիստին մասնակցելու համար, հայտնել է Sputnik Բելառուսի թղթակիցը։

Ինչպես միշտ, Կուչմային ուղեկցող շարասյունը ժամանել է եռակողմ խմբի նիստից մի քանի ժամ առաջ, մեքենաները մտել են ստորգետնյա կայանատեղի, և Ուկրաինայի նախկին նախագահը կայանատեղիից վերելակով բարձրացել է խմբի նիստերի անցկացման հարկ։ Ծրագրվում է, որ հանդիպումը կսկսվի Մինսկի ժամանակով 16։00–ին։

Պաշտոնական տեղեկություն այն մասին, թե այս պահին եռակողմ խմբի մասնակիցներից ով է ժամանել Մինսկ, դեռ չկա, բայց ինչպես հայտնի է դարձել լրագրողներին, ԼԺՀ և ԴԺՀ լիազոր ներկայացուցիչներ Վլադիսլավ Դեյնեգոն և Դենիս Պուշիլինն արդեն Մինսկ են ժամանել։ Ժամանել է նաև ԵԱՀԿ ներկայացուցիչ Մարտին Սայդիկը։

Շփման խմբի նախորդ նիստի գլխավոր արդյունքն այն էր, որ կողմերը համաձայնագիր ստորագրեցին 100 միլիմետրից պակաս տրամաչափի սպառազինությունն ու տանկերը բաժանարար գծից հետ տանելու մասին

Համաձայնագրի տեքստն արժանացել է Շփման խմբի անվտանգության ենթախմբի նիստի հավանությանը հուլիսի 21–ին, սակայն ինքը` շփման խումբը, այն այդպես էլ չի նախավավերացրել։  

Դոնեցկի և Լուգանսկի ինքնահռչակ ժողովրդական հանրապետությունների ներկայացուցիչները հայտնել են, որ այդ փաստաթուղթն անձամբ կստորագրեն ԴԺՀ և ԼԺՀ ղեկավարներ Ալեքսանդր Զախարչենկոն և Իգոր Պլոտնիցկին։