ԶԼՄ. ԱՄՆ–ն մտադիր է Մերձբալթիկայում պայքարել «ռուսական քարոզչության» դեմ

ԵՐԵՎԱՆ, 10 օգոստոսի– Sputnik. Լիտվայում ամերիկյան դեսպանատունը հայտարարել է, որ ռուսալեզու թղթակիցների համար 500 հազար դոլար դրամաշնորհ է սահմանվել, հաղորդում է «Իզվեստիան»։ Մինչև 2016թ.–ի նոյեմբերի 30–ը նախատեսված տարեկան նախագիծը ստացել է «Բալթյան երկրներում ռուսական հաղորդակցության հակազդեցության համար հետաքննչական լրագրության դասընթաց» անվանումը։

Նախագծի ազդեցությունը տարածվում է բոլոր մերձբալթյան երկրների վրա, նախագծի համակարգիչն է Լիտվայում ԱՄՆ դեսպանատունը։

ԱՄՆ պետդեպարտամենտը նախատեսում է կապերի համակարգ ստեղծել նախագծի շրջանավարտների և «ամերիկյան ուսուցիչների, փորձագետների» միջև` «լսարանի և աղբյուրների օղակի ընդլայնման» նպատակով։ Առանձին ընդգծվում է, որ դասընթացների մասնակիցներին կհատկացվեն դրամական մրցանակներ։

«Արևմուտքում արդեն վաղուց բանավեճեր են ծավալվում այն մասին, որ արևմուտքը պարտվում է տեղեկատվական պատերազմում։ Ուստի կարծիքներ են եղել այն մասին, որ պետք է մեծ գումարներ հատկացնել ռուսալեզու ԶԼՄ ստեղծելու համար` ռուսական տեղեկատվական ալիքների դեմ պայքարելու նպատակով։ Նման բանավեճերի շրջանակում էլ Մերձբալթիկայում իրագործվում է այդ նախագիծը»,–  «Իզվեստիային» իրավիճակը մեկնաբանել է քաղաքագետ Անդրանիկ Միհրանյանը։