Տյանցզինում նատրիումի ցիանիդի պարունակությունը մի քանի անգամ գերազանցել է սահմանաչափը

ԵՐԵՎԱՆ, 17 օգոստոսի– Sputnik. Չինաստանի Տյանցզին արդյունաբերական նավահանգստային քաղաքի վտանգավոր նյութեր պարունակող պահեստում գրանցված պայթյունի վայրում քաղաքի արտահոսող ջրերի որակի վերահսման 17 կայանները գրանցել են նատրիումի ցիանիդի բարձր պարունակություն։ Կայաններից մեկը գրանցել է, որ ցուցանիշը գերազանցել է սահմանաչափը 27,4 անգամ, երկուշաբթի տեղեկացրել է քաղաքի շրջակա միջավայրի պաշտպանության դեպարտամենտի գլխավոր ինժեներ Բաո Ցզինլինը։

«Արտահոսող ջրերի վերահսկման 17 կայաններն ընդհանուր առմամբ պայթյունի վայրում գրանցել են ցիանիդի պարունակություն, երեք կայաններում ցուցանիշները գերազանցել են սահմանաչափը։ Վերահսկիչ կայաններից մեկը գրանցել է, որ ցուցանիշը գերազանցել է սահմանաչափը 27,4 անգամ, մնացած երկուսը` համապատասխանաբար 4,37 և 0,96 անգամ», – պաշտոնյանի խոսքերը մեջբերում է China Daily թերթը։

Մինչ այդ օդի որակի վերահսման 17 կայաններից մեկը գրանցել է ցիանիդային ջրածնի բարձր պարունակություն, ցուցանիշը 0,08 անգամ գերազանցել է սահմանաչափը։

Կիրակի Պեկինի ռազմական օկրուգի շտաբի պետը հաստատել է, որ արտակարգ պատահարի երկու գոտիներում, նախնական տվյալներով, հայտնաբերվել է մի քանի հարյուր տոննա նատրիումի ցիանիդ։ Չինական ԶԼՄ–ները տեղեկացրել են, որ պահեստում կարող էր գտնվել ավելի քան 700 տոննա նատրիումի ցիանիդ։

Տյանցզինի քաղաքապետի տեղակալ Խե Շուշանը երկուշաբթի առավոտյան նաև հայտարարել է, որ մինչև օրվա վերջ նախատեսվում է ամբողջությամբ հավաքել և չեզոքացնել նատրիումի ցիանիդը պայթյունի էպիկենտրոնից 3 կմ շառավղով։

Չորեքշաբթի Տյացզին արդյունաբերական քաղաքի պահեստում խոշոր պայթյուն է գրանցվել։ Պահեստում եղել են վտանգավոր քիմիական նյութեր։ Առաջին պայթյունից հետո, որի հզորությունը տրոտիլային համարժեքով կազմում է 3 տոննա, հետևել են մի քանի նոր պայթյուններ, որոնցից ամենախոշորի հզորությունը տրոտիլային համարժեքով կազմել է 21 տոննա։ 

Երկուշաբթի առավոտյան հրապարակված վերջին տվյալներով` պայթյունի հետևանքով զոհվել է 114 մարդ, 70 մարդ անհետ կորած է համարվում, ևս 698–ը տեղափոխվել է հիվանդանոց։