ԵՐԵՎԱՆ, 8 սեպտեմբերի– Sputnik. Եթե Ռուսաստանը չմիջամտեր, Սիրիայում կարող էր ցեղասպանություն իրականացվել, երեքշաբթի «Հայաստան–Ռուսաստան. փոխհարաբերություններ և հեռանկարներ» տեսակապի ժամանակ ասել է ԱՊՀ երկրների Կովկասի ինստիտուտի բաժնի վարիչ Վլադիմիր Եվսեևը։
Սեպտեմբերի 3–ին ՌԴ ԱԳՆ–ի պաշտոնական ներկայացուցիչ Մարիա Զախարովան հայտարարել է, որ Ռուսաստանը շարունակելու է Սիրիային անհրաժեշտ աջակցություն ցուցաբերել ահաբեկչության դեմ պայքարում։
«Ես Սիրիայում եղել եմ երկու ամիս առաջ, Բաշար Ասադի իշխանությունն այդքան թույլ չէ, որքան սիրում են ասել ԶԼՄ–ները։ Սակայն իրավիճակը շարունակում է բարդ մնալ։Կարծում եմ, որ Ռուսաստանը ժամանակին օգնության է հասել սիրիացիներին, եթե դա չլիներ, ապա իրավիճակն այնտեղ կզարգանար ավելի վատ սցենարով, քան Լիբիայում»,– ասել է Եվսեևը։
Նրա խոսքով` լիբիական իրադարձությունների կրկնության հետ մեկտեղ իրավիճակը կնշանավորվեր սիրիացի ժողովրդի ցեղասպանությամբ։
«Հենց այդ պատճառով Ռուսաստանը որոշում է ընդունել սիրիական կառավարությանն օգնելու մասին։ Ենթադրում եմ, որ առաջիկա ամսվա ընթացքում ռազմաճակատներում իրավիճակը կսկսի սկզբունքորեն փոխվել»,– նշել է Եվսեևը։
Նա ընդգծել է, որ կառավարական ուժերի պարտության դեպքում իշխանությունների հետ բանակցություններ չեն լինի, իսկ եթե սիրիական բանակը սկսի հաղթել, ապա բանակցությունների համար կստեղծվի բարենպաստ միջավայր։
