ԵՐԵՎԱՆ, 16 հոկտեմբերի– Sputnik. Աֆրիկայի ֆուտբոլի ֆեդերացիայի ղեկավար Իսան ժամանակավորապես նշանակվել է Ֆուտբոլի միջազգային ֆեդերացիայի (ՖԻՖԱ) նախագահի պաշտոնակատար, հաղորդում է championat.com–ը։
Կայքի տվյալներով` նախօրեին Հայաթուն ժամանել է Ցյուրիխ, որտեղ գտնվում է ՖԻՖԱ—ի կենտրոնակայանը։ Նա ողջունել է ՖԻՖԱ-ի գլխավոր քարտուղարի պաշտոնակատար Մարկուս Կատներին և կոչ արել կազմակերպության անդամներին` կենտրոնանալ իրենց պարտականությունների կատարման վրա։
«Իհարկե, սա աննախադեպ իրավիճակ է ՖԻՖԱ–ի համար։ Բայց մենք շարունակում ենք կենտրոնանալ բարեփոխումների անհրաժեշտ գործընթացի, նախագահական ընտրությունների և ընթացիկ հետաքննություններին աջակցելու վրա։ Հասարակության վստահության վերականգնումն առանցքային նպատակ է։ Կարևոր է, որ ՖԻՖԱ–ն շարունակում է խաղի զարգացման և միջազգային մրցաշարերի կազմակերպման իր առաքելությունը»,– մեջբերում է Հայաթուի խոսքերը ՖԻՖԱ–ի մամուլի ծառայությունը։
