21:49 27 նոյեմբերի 2020
Ուղիղ եթեր
  • USD508.21
  • GBP678.82
  • EUR605.94
  • RUB6.70
Աշխարհ
Ստանալ կարճ հղումը
396 0 0

Երկրների առաջնորդները պետք է հասկանան, թե որքան վտանգավոր կարող են լինել պատերազմական խաղերը և հնարավոր ամեն ինչ անեն, որպեսզի մարեն հինգ առավել պայթյունավտանգ օջախները, գրում է National Interest ամերիկյան ամսագիրը

ԵՐԵՎԱՆ, 21 նոյեմբերի- Sputnik. Յուրաքանչյուր գլոբալ պատերազմ սկսվում է կայծից, նշում է National Interest-ը և ներկայացնում պատերազմի բռնկման այն կարևոր օջախները, որոնք պետք է մշտապես լինեն աշխարհի ուշադրության կենտրոնում:

Առաջինը սիրիական հակամարտությունն է: «Իսլամական պետություն» խմբավորման տարածումն անհանգստացնում է համաշխարհային գերտերություններին, որոնց թվում են Ֆրանսիան, Ռուսաստանը և ԱՄՆ-ն, բայց անգամ կոալիցիա կազմելով՝ դաշնակիցների միջև կարող են բախումներ ծագել, որովհետև նրանցից յուրաքանչյուրը Սիրիայի ապագայի վերաբերյալ սեփական մոտեցումն ունի: Չի բացառվում, որ արտաքին ուժերի մարտական գործողությունները կարող են ներգրավել նաև Թուրքիային, Իրանին և Սաուդյան Արաբիային, և հնարավոր է, որ հակամարտությունը տարածվի երկրագնդի այլ վայրերի վրա:

Նման օջախներից մեկը Հնդկաստանի և Պակիստանի միջև առկա հակասությունն է, որը թեև երկար տարիների պատմություն ունի, այնուհանդերձ ցանկացած պահի կարող է սրվել: Եթե Պակիստանի կողմից հովանավորվող արմատական խմբավորումներն այնպիսի ահաբեկչական գործողություններ ծավալեն, ինչպիսին եղան Մումբայում, ապա Հնդկաստանի համբերությունը կարող է հատել: Իսկ եթե Պակիստանը լուրջ պարտություն կրի, այդ դեպքում երկրի համար միակ ելքը կմնա միջուկային մարտավարական զենքի կիրառումը: Հակամարտությանը կարող է ներգրավվել ԱՄՆ-ն, որը վերջին ժամանակաշրջանում ավելի ու ավելի է մտերմանում Հնդկաստանի հետ, ինչպես նաև՝ Չինաստանը, որը կարող է աջակցություն հայտնել Պակիստանին:

Երրորդ տեղում Արևելաչինական ծովում տիրող իրավիճակն է, որտեղ վերջին երկու տարիներին Չինաստանն ու Ճապոնիան վտանգավոր խաղ են վարում Սենկակու արշիպելագի շուրջ: Նրանցից յուրաքանչյուրը հավակնություններ ունի կղզու նկատմամբ և ռազմական ներուժ են կուտակել կղզու շուրջը: Եթե Չինաստանի և Ճապոնիայի միջև հակամարտություն ծագի, ապա Ճապոնիայի հետ ունեցած ռազմական փոխադարձ աջակցության համաձայնագիրը ԱՄՆ-ին թույլ չի տա չմիջամտել այս հակամարտությանը, իսկ Չինաստանը կփորձի առաջ ընկնել և հարձակում գործել տարածաշրջանում տեղակայված ամերիկյան ռազմական օբյեկտների վրա:

Անհանգստացնող է նաև Հարավչինական ծովում առկա իրավիճակը, քանի որ Միացյալ նահանգները վտանգավոր առճակատման է դուրս եկել չինական ծովային և օդային ստորաբաժանումների հետ: Կողմերից յուրաքանչյուրը կարող է կորցնել ինքնատիրապետումը, ինչը սարսափելի հետևանքների կհանգեցնի:
Ըստ հոդվածագրի, համաշխարհային պատերազմի հնարավոր պատճառ կարող է դառնալ նաև Ուկրաինայի ճգնաժամը: Այստեղ իրադարձությունների զարգացումը կախված կլինի այն հանգամանքից, թե ՆԱՏՕ-ն որքանով պատրաստ կլինի միջամտել իրավիճակին: Եթե Ռուսաստանը համոզված լինի, որ ՆԱՏՕ-ն լուրջ գործողությունների է դիմելու, ապա  ամեն ինչ կանի, որպեսզի խանգարի դաշինքի մոբիլիզացիային:

National Interest-ը նշում է, որ երկրներն ասես չեն գիտակցում, թե ինչի կարող է հանգեցնել «կռիվ-կռիվ» խաղալը: Գերտերությունները պետք է զգոն լինեն և կանխեն ճգնաժամերի թեժացումը, եզրափակում է հոդվածի հեղինակը:

Գլխավոր թեմաներ