ԵՐԵՎԱՆ, 7 դեկտեմբերի-Sputnik. Ֆրանսահայ լեգենդար կոմպոզիտոր և շանսոնյե Շառլ Ազնավուրը հիշում է Սպիտակի աղետալի երկրաշարժն ու հարգում անմեղ զոհերի հիշատակը: Sputnik Արմենիայի փոխանցմամբ՝ իր ֆեյսբուքյան էջում Ազնավուրն այսօր տեղադրել է «Քեզ համար, Հայաստան» երգն ու գրառում թողել:
«1988 թվականի դեկտեմբերի 7. աղետալի երկրաշարժը Հայաստանում ավերածություններ պատճառեց, ինչի հետևանքով տասնյակ հազարավոր մարդիկ զոհվեցին, իսկ հարյուր հազարներն էլ մնացին անօթևան»,-նշել է Շառլ Ազնավուրը:
Ստորև ներկայացնում ենք Ազնավուրի գրառման տակ ֆրանսիացիների մեկնաբանությունները.
«Ես շատ լավ եմ հիշում… հայ ընկերներ ունեմ: Բոլոր այս ցնցումներն ավերիչ են ու հետք են թողնում… անհնար է մոռանալ»,.- Ժան լե Մուան։
«Ես գրկում եմ Նիսի իմ բոլոր հայ ընկերներին, որոնց հաճախ եմ հիշում և համբույրներ եմ ուղարկում: Շնորհակալ եմ, Շառլ Ազնավուր, որ մեզ հիշեցնում եք այս աղետի մասին, ես Ձեզ պաշտում եմ որպես մեծ երգչի և արտիստի»,- Լիլիան Դյուվալ։
«Ես սիրում եմ Ազնավուրին, ընդմիշտ»,- Նիկոլ Վանդերկելեն։
«Շատ հուզիչ է: Աչքերիս արցունքներ հայտնվեցին»,- Անի Մենստեր
«Հարգանքներս Շառլ Ազնավուրին և նրա հայրենիքին»,- Միրեյ Ֆորնե։
