ԵՐԵՎԱՆ, 24 դեկտեմբերի — Sputnik. Զիմբաբվեի «պալատական հեղաշրջումից» հետո երկրի նախագահի գործառույթները ստանձնել է 91-ամյա նախագահ Ռոբերտ Մուգաբեի կինը, իսկ կառավարությունը կաթվածահար է եղել, գրում է բրիտանական Guardian թերթը` հղում անելով «Հանուն ժողովրդավարական փոփոխությունների» (MDC) ընդդիմադիր կուսակցության ղեկավար Մորգան Ցվանգիրային։
Ինչպես գրում է թերթը, Գրեյս Մուգաբեն վերջին շրջանում մեծ համբավ է ձեռք բերել Զիմբաբվեի քաղաքական կյանքում։ Անցյալ տարվա դեկտեմբերին նա զբաղեցրեց «Զիմբաբվեի աֆրիկյան ազգային միություն. հայրենասիրական ճակատ» իշխող կուսակցության առանցքային պաշտոններից մեկը։
«Կառավարությունում ոչ ոք չի մտածում ազգային խնդիրները լուծելու մասին, քանի որ բոլորին միայն մի միտք է մտահոգում` ո՞վ է փոխարինելու զառամյալ նախագահին», — ասել է Ցվանգիրային։
Տեղի ԶԼՄ-ները հայտնում են, որ ձևավորվել է կուսակցությունների երկու հակադիր ճամբար, որոնցից մեկը գլխավորում է բանակի հրամանատար Էմերսոն Մնանգագվան, մյուսը` Գրեյս Մուգաբեն, ով իր շուրջն է հավաքել երիտասարդ քաղաքական գործիչներին։ Ըստ Ցվանգիրայիի, այս ամենի ֆոնին նախագահի կինն օգտվել է ստեղծված իրավիճակից և «հաճույքով» իր ձեռքն է վերցրել երկրի իշխանությունը։
Ինչպես նշում է Guardian-ը տեղի բնակչությանը վրդովում է այն փաստը, որ Գրեյս Մուգաբեն հաճախ է արտասահման մեկնում թանկարժեք իրեր գնելու համար, այն դեպքում, որ երկրի տնտեսությունը ծանր վիճակում է։
Ռոբերտ Մուգաբեն աշխարհում ամենատարեց ղեկավարներից մեկն է։ Նա անտեսում է սեփական տարիքն ու ակտիվ քաղաքականությամբ զբաղվում։ Մասնավորապես, դեկտեմբերին նա կրկին վերընտրվել է «Զիմբաբվեի աֆրիկյան ազգային միություն. հայրենասիրական ճակատ» իշխող կուսակցության ղեկավարի պաշտոնում և դարձել 2018 թվականի նախագահական ընտրությունների թեկնածուներից մեկը։ 2018 թվականին կլրանա նրա 94 տարին։
