ԵՐԵՎԱՆ, 19 հունվարի- Sputnik. Ճապոնիայի Նագոյա քաղաքի հիվանդանոցում 112 տարեկան հասակում մահացել է աշխարհի ամենատարեց մարդը, երեքշաբթի հայտարարել է առողջապահության, աշխատանքի և սոցիալական ապահովման նախարարությունը:
Կիոդո գործակալությունը հայտնում է, որ մահացած երկարակյացի անունը Յասուտարո Կոյդե էր: Նա ծնվել էր 1903թ.-ի մարտի 13-ին: Այժմ Ճապոնիայի ամենատարեց մարդը համարվում է Տոկիոյում բնակվող 111-ամյա Մասամիցու Յոսիդան:
Գիտնականները հաշվարկել են, որ եթե ծնելիության մակարդակը ցածր մնա, ապա ճապոնացիները որպես ազգ կանհետանան երկրի երեսից մինչև 2959թ.:
Նման կանխատեսումները վախեցնում են ոչ միայն սովորական մարդկանց, այլ նաև կառավարությանը, որը ստիպված է պետբյուջեի առյուծի բաժինը հատկացնել բժշկական կարիքներին:
Խնդիրն ավելի ու ավելի արդիական է դառնում, ճապոնացիների երկարակեցության պատճառով նույնիսկ նոր տերմին է առաջացել՝ «oldest old» (տարեցների մեջ ամենատարեցը): Հասարակության այդ շերտն ընդգրկում է երկրի այն բնակիչներին, որոնք հատել են 85 տարեկանի սահմանը: Ի տարբերություն սովորական կենսաթոշակառուների, այդ մարդիկ մշտական խնամք ու պետական ծախսեր են պահանջում, ինչն իր հերթին թուլացնում է երկրի տնտեսական հզորությունը:
Ծերացման ամերիկյան ազգային ինստիտուտի տվյալով՝ պատմության մեջ առաջին անգամ 65 տարեկանից բարձր մարդկանց թիվը գերազանցել է 5 տարեկանից փոքր երեխաների թիվը: Այս ամենից կարելի է հետևություն անել` մեզ կա՛մ բնակչության գլոբալ ծերացում է սպասում, կա՛մ էլ գիտաֆանտաստիկ ֆիլմերի պես ստիպված ենք լինելու երեխաներին «աճեցնել» փորձանոթներում:
