ԵՐԵՎԱՆ, 28 հունվարի — Sputnik. ԱՄՆ-ի նախագահ Բարաք Օբաման առաջին անգամ խոսել է ամերիկյան «Օսկար» կինոմրցանակի շուրջ ծավալված սկանդալի մասին ու կոչ արել, որ կինոէկրաններին հայտնվեն նաև էթնիկ ու ռասայական փոքրամասնությունները։
2016 թվականի առաջատար անվանակարգերում փոքրամասնությունների ոչ մի ներկայացուցիչ «Օսկար» մրցանակի չի առաջադրվել, ինչը կինոյի ոլորտի հայտնի գործիչների քննադատության պատճառ է դարձել։ Ակադեմիան հայտնել է, որ մինչև 2020 թվականը բարեփոխումներ կանցկացնի և իր կազմում կկրկնապատկի կանանց ու փոքրամասնությունների ներկայացուցիչների թիվը։
«Կարծում եմ, որ եթե պատմենք յուրաքանչյուր մարդու պատմությունը, ապա արվեստն ինքը շատ ավելի լավը կլինի։ Կինոարդյունաբերությունն ավելի լավը կլինի, բոլորն իրենց ամերիկյան ընտանիքի մի մասը կզգան», —ասել է Օբաման` ԱՄՆ-ի առաջին աֆրոամերիկացի նախագահը։
«Կարծում եմ, որ արդյունաբերությունն ընդհանուր առմամբ պետք է անի այն, ինչ ցանկացած այլ ոլորտ` գտնի տաղանդներին, բոլորին հնարավորություն ընձեռի։ Ու ես կարծում եմ, որ «Օսկարի» շուրջ ծավալված բոլոր քննարկումներն իրականում ավելի լուրջ խնդիր են բարձրացնում` արդյո՞ք մենք հասել ենք նրան, որ յուրաքանչյուրն իր հնարավորությունը ստանա», — եզրափակել է ԱՄՆ-ի նախագահը։
