ԵՐԵՎԱՆ, 14 մարտի- Sputnik. Սեքսն ու սեռական կյանքն ամոթալի երևույթներ չեն, սակայն նողկալի է այն, որ ինչ-որ մեկը նկարում և տարածում է դա, հայտարարել է Վրաստանի նախագահ Գեորգի Մարգելաշվիլին` մեկնաբանելով աղմուկ բարձրացրած ինտիմ բնույթի տեսագրությունները, որոնց գլխավոր «դերակատարները» վրացի քաղաքական գործիչներն են։
Մարտի 14-ին համացանցում տարածվել է թաքնված տեսախցիկով նկարահանված հերթական տեսագրությունը (վերջին շրջանում սա երկրորդ տեսանյութն է)։ Տեսագրությունների տարածումից հետո Վրաստանի գլխավոր դատախազությունը քրեական գործ է հարուցել ։
«Ուզում եմ բացահայտ ասել, որ սեքսն ու սեռական կյանքն ամոթալի բաներ չեն։ Ես ինքս սեռական կյանք ունեցել եմ, ունեմ և ունենալու եմ։ Եվ իմացեք, որ միշտ կաջակցեմ ձեզ և կմաքրեմ այդ թեման սև ու մռայլ խարազանից»,- ճեպազրույցի ժամանակ ասել է Մարգելաշվիլին։
«Այժմ դիմում են նրանց, ովքեր պատրաստվում են շանտաժի ենթարկել իմ երկրի բնակչությանն ու հասարակությանը, բոլորին կգտնենք, և դուք չեք կարողանա վախեցնել և ահաբեկել մարդկանց։ Վրացի ժողովուրդը երբեք ձեր խավարամիտ գաղափարներով չի ապրել, նա միշտ ազատ է եղել»,- ասել է նախագահը։
Նա ավելացրել է, որ տեսագրությունը տարածող յուրաքանչյուր ոք ինքնաբերաբար այդ «կեղտոտ գործընթացի» բարոյական մասնակիցն է դառնում։
«Այդ տեսանյութերը նողկալի են ոչ թե այն պատճառով, որ սեռական կյանքն են ցուցադրում, այլ որ ոմանք նկարում են դա»,- ասել է Մարգելաշվիլին։
Վրաստանի նախագահը նշել է, որ «ողջ պետական համակարգն աշխատում է ակտիվ և համակարգված արդյունքի հասնելու համար», սակայն նրա խոսքով` գործը կարող է շատ արագ բացահայտվել, բայց վրացի ժողովուրդը պետք է ցույց տա բոլոր սադրիչներին, որ մարդկանց չի հետաքրքրում ուրիշի սեռական կյանքը։
