ԵՐԵՎԱՆ, 2 ապրիլի — Sputnik. ԱՄՆ-ն վճռականորեն դատապարտում է ղարաբաղյան հակամարտության գոտում հրադադարի ռեժիմի խախտումը և կողմերին կոչ է անում զսպվածություն ցուցաբերել, քանի որ հակամարտությունը ռազմական լուծում չունի, շաբաթ հայտարարել է ԱՄՆ պետքարտուղար Ջոն Քերին։
Շաբաթ օրը Հայաստանն ու Ադրբեջանը հայտնել են ղարաբաղյան հակամարտության գոտում իրավիճակի սրման մասին. Ադրբեջանի ՊՆ-ն հայտնում է, մասնավորապես, Հայաստանի զինված ուժերի կողմից կրակոցների մասին, ընդ որում հայկական ռազմական գերատեսչությունը հայտնել էր «հարձակվողական գործողությունների մասին» Ադրբեջանի կողմից։ Հայտնում են, որ երկու կողմերն էլ զոհեր են ունեցել։
«ԱՄՆ-ն դատապարտում է Լեռնային Ղարաբաղի շփման գոտու ողջ երկայնքով հրադադարի խախտումը, որի պատճառով, ըստ հաղորդումների, եղել են զոհեր, այդ թվում` խաղաղ բնակչության շրջանում», — հայտնել է Քերին։
«Մենք կոչ ենք անում բոլոր կողմերին զսպվածություն ցուցաբերել և խստորեն պահպանել հրադադարի ռեժիմը… Մենք կրկնում ենք, որ հակամարտության ռազմական լուծում չկա։ Որպես համանախագահ երկիր` ԱՄՆ-ն հավատարիմ է կողմերի հետ աշխատանքին` ամուր և համաձայնեցված խաղաղության հասնելու համար», — ավելացրել է նա։
«Տեղերում անկայուն իրավիճակը ցույց է տալիս, թե ինչու կողմերը պետք է անհապաղ սկսեն բանակցություններ ԵԱՀԿ ՄԽ հովանու ներքո` հակամարտության լուծման համար», — ասվում է պետքարտուղարի հայտարարության մեջ։
Ավելի վաղ ՄԽ ամերիկացի, ռուս և ֆրանսիացի համանախագահները համատեղ հայտարարությամբ էին հանդես եկել, որում հայտնել էին իրենց «խորին մտահոգությունը» ԼՂՀ իրավիճակով և դատապարտել էին կողմերի կողմից ուժի կիրառումը` կոչ անելով նրանց կայունացման և բանակցություններ վերսկսելու քայլեր ձեռնարկել։
