ԵՐԵՎԱՆ, 2 սեպտեմբերի — Sputnik. Թուրքիայի վարչապետ Բինալի Յըլդըրըմը ցավակցություն է հայտնել Ուզբեկստանի նախագահ Իսլամ Քարիմովի մահվան կապակցությամբ, սակայն Ուզբեկստանի կառավարությունը երկրի ղեկավարի առողջական վիճակի վերաբերյալ պաշտոնական հայտարարություն դեռ չի արել։ Այդ մասին հայտնում է ՌԻԱ Նովոստին։
«Ուզբեկստանի նախագահ Իսլամ Քարիմովը վախճանվել է։ Թող Ալլահը հանգստացնի նրա հոգին։ Թուրքական Հանրապետության անունից խորապես ցավակցում եմ Ուզբեկստանի ժողովրդին»,- ասել է Յըլդըրըմը Անկարայում թուրքական կառավարության նիստում, որը հեռարձակվում է ուղիղ եթերով։
Ուրբաթ առավոտյան Ուզբեկստանի կառավարությունը հաղորդել էր, որ Քարիմովը գտնվում է ծայրահեղ վիճակում։ Ավելի ուշ Ռոյթերս գործակալությունը, հղում անելով դիվանագիտական աղբյուրներին, հայտնել է, որ Ուզբեկստանի նախագահը վախճանվել է։ Երկրի իշխանությունները չեն մեկնաբանում այդ տեղեկությունը։ Պաշտոնական հաղորդագրություն նույնպես չկա։ Կրեմլից հաղորդում են, որ Քարիմովի առողջական վիճակի մասին նորություն չունեն։
