ԵՐԵՎԱՆ, 8 սեպտեմբերի — Sputnik. Sputnik.Կարծիք հարցման տվյալների համաձայն` Գերմանիայի (74%), Ֆրանսիայի (65%) և Իտալիայի (63%) բնակչության մեծ մասը կարծում է, որ սեպտեմբերի 11-ի ահաբեկչական գործողությունից հետո ԱՄՆ-ի ձեռնարկած քայլերը չեն ուժեղացրել աշխարհի անվտանգությունը։
Իսկ ԱՄՆ-ի բնակիչները պակաս հոռետեսորեն են վերաբերվում աշխարհի անվտանգությանն ուղղված գործողություններին. 54%-ն ասել է, որ ԱՄՆ-ն հաջողությամբ է իրականացնում ահաբեկչության դեմ պայքարը, 39%-ը դեմ է արտահայտվել, 7%-ն ընտրել է «չգիտեմ» պատասխանը։ Սրանք Ifop հետազոտական ընկերության անցկացրած հարցման տվյալներն են։ Նշենք, որ հարցումն անցկացվել է Sputnik լրատվական գործակալության և ռադիոյի պատվերով։
2001 թվականի սեպտեմբերի 11-ի ահաբեկչություններից հետո ԱՄՆ-ն ներքին և միջազգային անվտանգությունն ամրապնդելու քայլեր էր ձեռնարկել։ Ընդունվել էր, այսպես կոչված, «Հայրենասիրական ակտը», որն ընդլայնում էր Հետաքննությունների դաշնային բյուրոյի ` ԱՄՆ-ում և արտերկրում բնակվող քաղաքացիների և կազմակերպությունների մասին տվյալների հավաքագրման իրավունքները։
Ահաբեկչական վնասները նվազեցնելու նպատակով ռազմական գործողություններ էին իրականացվել Աֆղանստանում և Իրաքում։ «Արդյո՞ք սեպտեմբերի 11-ի ահաբեկչությունից հետո ԱՄՆ-ի ձեռնարկած միջոցները կյանքն ավելի անվտանգ են դարձրել» հարցին գերմանացիների միայն 20%-ը, ֆրանսիացիների 24%-ը և իտալացիների 30%-ն են դրական պատասխան տվել։ «Չգիտեմ» պատասխան է տվել Գերմանիայի բնակչության 6%-ը, Ֆրանսիայի բնակչության 11%-ը և Իտալիայի բնակչության 7%-ը։
Հարցումն անցկացրել է Ֆրանսիայի հնագույն Ifop հետազոտական ընկերությունը 2016 թվականի հունիսի 28-ից հուլիսի 4-ը Գերմանիայում, Ֆրանսիայում և Իտալիայում և օգոստոսի 26-30-ը։ Հարցմանն, ընդհանուր առմամբ մասնակցել է 18 տարեկանից բարձր 4015 մարդ. Գերմանիայից`1000, Ֆրանսիայից` 1004 և Իտալիայից` 1002 և ԱՄՆ-ից` 1009։ Ընտրանքն իրականացվել է ըստ հարցվածների սեռի, տարիքի և բնակության վայրի։ Տվյալների անճշտության առավելագույն մակարդակը կազմում է ավելի քան 3,1%` 95% վստահության հավանականության դեպքում:
Հասարակական կարծիքի ուսումնասիրման միջազգային նախագիծը մեկնարկել է 2015 թվականի հունվարին։ Գործընկերն են Populus, Ifop և Forsa հայտնի հետազոտական ընկերությունները։ Sputnik.Կարծիք նախագծի շրջանակում կանոնավոր կերպով հասարակական կարծիքի հարցումներ են անցկացվում Եվրոպայի և ԱՄՆ-ի երկրներում առավել արդիական սոցիալական և քաղաքական հարցերի վերաբերյալ։
Sputnik-ը (sputniknews.com) լրատվական գործակալություն է և ռադիո` տասնյակ երկրներում մուլտիմեդիոն տեղեկատվական ներկայացուցչություններով: Sputnik-ը ներառում է ավելի քան 30 լեզվով կայքեր, անալոգային և թվային ռադիոհեռարձակում, բջջային հավելվածներ և էջեր սոցիալական կայքերում։ Sputnik-ի լուրերը շուրջօրյա ռեժիմով թողարկվում են անգլերեն, արաբերեն, իսպաներեն և չինարեն լեզուներով:
