ԵՐԵՎԱՆ, 20 հունվարի — Sputnik. Նոր Հարավային Ուելսի նահանգի գլխավոր գանձապետ Գլեդիս Բերեջիկլյանն առաջադրվել է վարչապետի պաշտոնում։ Այս մասին նա գրել է Facebook սոցցանցի իր էջում` մեկնաբանելով նահանգի վարչապետ Մայք Բեյրդի պաշտոնանկությունը։
«Ես խորապես տպավորված եմ Մայք Բեյրդի քաղաքականությունից հեռանալու որոշման մասին հայտարարությունից։ Մայքը ոգեշնչող առաջնորդ է և շատ ազնիվ ու բարեխիղճ մարդ, նա հսկայական հետք է թողել Նոր Հարավային Ուելսի նահանգի պատմության մեջ», — գրել է Բերեջիկլյան։
Նա Բեյրդին անվանել է հիանալի առաջնորդ, որի հետ աշխատել է վեց տարի։ Գլեդիս Բերեջիկլյանը մեծ համբավ է վայելում ավստրալիացիների շրջանում։ Բերեջիկլյանի պատմությունը մոտ է շատ ավստրալացիների պատմությանը. նա սերում է հայ փախստականների ընտանիքից, լավ կրթություն է ստացել և հաջողության հասել պետական պաշտոններում։ Ներկա պահին նա զբաղեցնում է Նոր Հարավային Ուելսի նահանգի արտադրական կապերի նախարարի պաշտոնը։
