ԵՐԵՎԱՆ, 24 հունվարի — Sputnik. Հոլիվուդյան դերասանուհի Անջելինա Ջոլին կդառնա Guerlain հնագույն օծանելիքի տներից մեկի նոր բույրի դեմքը։ Guerlain-ն ունի նաև «Հայկական անտառներ» անվանումով օծանելիք։ Այդ մասին հայտնել են Guerlain-ի ներկայացուցիչները Instagram-ի իրենց պաշտոնական էջում։
Guerlain-ի գլխավոր պարֆյումեր Թիերի Վասերի ստեղծած օծանելիքը նախատեսվում է վաճառքի հանել 2017 թվականի մարտին։
Bois d'Armenie («Հայկական անտառներ») օծանելիքը նախատեսված է ինչպես կանանց, այնպես էլ տղամարդկանց համար, պատկանում է արևելյան փայտե բույրերի խմբին։ Բարձրակարգ պարֆյումեր Անիկ Մենարդի ստեղծած բույրը վաճառքի էր հանվել 2006 թվականին։
Ընկերության կայքում նշվում է, որ այն ստեղծված է հազվագյուտ օծանելիքի սիրահարների և ազնիվ նյութերի նկատմամբ զգայուն մարդկանց համար։
Guerlain-ը օծանելիք արտադրող տներից ամենահինն է աշխարհում, հիմնադրվել է 1828 թվականին Պիեր Ֆրանսուա Պասկալ Գերլենի կողմից։ Guerlain-ի առաջին բույրը կոչվում էր Esprit de Fleurs, Պասկալն այն ստեղծել էր 1829 թվականին իր կնոջ համար։ Տղամարդկանց համար նախատեսված առաջին բույրն էլ Imperiale-ն էր, որը ստեղծվել էր XIX դարում հատուկ Ֆրանսիայի կայսր Նապոլեոն III համար։ Ընկերության հիմնադրման օրվանից ի վեր ստեղծվել է մի քանի հարյուր բույր։
