ԵՐԵՎԱՆ, 24 փետրվարի — Sputnik. Ամերիկա մեկնելու և Գյուլենի հարցով անձամբ զբաղվելու պատրաստակամության մասին թուրք նախարար Բոզդաղը հայտարարել է «CNN Turk » հեռուստաալիքի հետ զրույցում, գրում է ermenihaber-ը:
Նրա խոսքով՝ Գյուլենի արտահանձման հարցով նա պատրաստ է նաև Թուրքիա հրավիրել ԱՄՆ-ի արդարադատության նորանշանակ նախարար Ջեֆֆ Սեսիոնին:
Այն հարցին, թե ինչպիսին կլինի պաշտոնական Անկարայի վերաբերմունքը, եթե ԱՄՆ-ն հրաժարվի Գյուլենին արտահանձնել, Բոզդաղը ասել է, որ դա լուրջ հարված կհասցնի թուրք-ամերիկյան հարաբերություններին:
Բոզդաղը նաև չի բացառել այն տարբերակը, որ Գյուլենը ԱՄՆ-ից կարող է փախնել երրորդ երկիր: Որպես հնարավոր երրորդ երկիր Բոզդաղը օրինակ է բերել Եգիպտոսը, Բրազիլիան, Հարավաֆրիկյան Հանրապետությունը և Կանադան: Նա հիշեցրել է, որ վերջինիս հետ Թուրքիան չունի արտահանձման վերաբերյալ պայմանագիր: Բոզդաղը նաև պնդել է, որ թուրքական հետախուզական տվյալներով՝ Գյուլենի համախոհներից ոմանք Կանադայում մեծ հողակտորներ են գնել և ԱՄՆ-ի ղեկավարությունը տեղյակ է դրա մասին:
