ԵՐԵՎԱՆ, 29 մարտի — Sputnik. Ֆրանսիայի Բորդո քաղաքի դատարանն 8 ամսից մինչև 9 տարով ազատազրկման է դատապարտել նախկին Խորհրդային Միության երկրներից գաղթած 22 տղամարդկանց՝ կազմակերպված հանցավորության մեղադրանքով։ Այս մասին հայտնում է ՌԻԱ Նովոստին` հղում անելով France-Presse-ին:
22 ներգաղթյալների թվում մարդիկ կան Հայաստանից, Վրաստանից, Ադրբեջանից և Ուզբեկստանից, որոնք մեղավոր են ճանաչվել գողության, դրամաշորթության, մաքսանենգության համար:
Ամբաստանյալների հանցավոր կազմակերպությունը գործել է Ֆրանսիայի գրեթե ողջ տարածքում՝ 2011 թվականից սկսած: Դատարանի բնութագրմամբ՝ խումբը տարբերվել է սովորական հանցավոր կազմակերպություններից:
Այնտեղ խիստ հիերարխիա է գործել, իսկ խմբի ենթադրյալ ղեկավարը եղել է 41-ամյա Արթուր Յուզբաշևը՝ ծագումով Վրաստանից, որը դատապարտվել է ինը տարվա ազատազրկման:
Ըստ ամբաստանյալներից մեկի փաստաբանի՝ նրանք մտադիր են բողոքարկել այդ որոշումը:
