ԵՐԵՎԱՆ, 16 ապրիլի — Sputnik. Սան Ֆրանցիսկոյում 85 տարեկանում Պակինսոնի հիվանդությունից մահացել է Ռոբերտ Թեյլորը, որը մասնակցել է համացանցի և համակարգչի ստեղծմանը: Այս մասին գրում է The Los Angeles Times-ը:
1960-ական թվականներին Թեյլորը ղեկավար պաշտոններ է զբաղեցրել այնպիսի նախագծերում, որոնք ազդեցություն են ունեցել ժամանակակից տեղեկատվական տեխնոլոգիաների վրա: 1961 թվականին աշխատելով NASA-ում՝ նա օգնել է ֆինանսավորել Դագլաս Էնգելբարտի նախագիծը, որի շնորհիվ էլ ստեղծվել է համակարգչային մկնիկը: 1966-ին Պենտագոնում ղեկավարել է Arpanet ցանցի մշակման ծրագիրը, որի նմանությամբ ստեղծվել է ժամանակակից ինտերնետը:
Բացի այդ, Թեյլորը մասնակցել է ծրագրերի, որոնք նպաստել են Microsoft Word ծրագրի ստեղծմանը: 1990-ականներին էլ նրա հետազոտական կենտրոնն օգնել է AltaVista որոնողական համակարգի մշակմանը:
