ԵՐԵՎԱՆ, 16 մայիսի — Sputnik. Ցանցահենները վստահեցնում են, որ իրենց հաջողվել է «Կարիբյան ծովի ծովահենները. մեռյալները հեքիաթներ չեն պատմում» ֆիլմի հասանելիություն ստանալ։ Ֆիլմը դեռ վարձույթի չի հանվել, և չարագործները սպառնում են այն հրապարակել համացանցում, եթե The Walt Disney Company-ն մեծ գումար չվճարի։ Այս մասին հայտնում է The Hollywood Reporter-ը։
Ընկերության տնօրեն Բոբ Այգերը հաստատել է այս տեղեկությունը, սակայն չի նշել, թե կոնկրետ որ ֆիլմի մասին է խոսվում։
Պարբերականի տվյալով` չարագործները զգալի գումար են պահանջել բիտկոինով և հայտարարել են, որ գումարը չստանալու դեպքում նախ 5 րոպեանոց հատված կհրապարակեն, իսկ հետո` 20 րոպե տևողությամբ հատվածներ։
Նշվում է, որ Walt Disney-ը չի պատրաստվում կատարել ցանցահենների պահանջը և ակտիվորեն համագործակցում է Հետաքննությունների դաշնային բյուրոյի հետ։ Ընկերությունն առայժմ չի մեկնաբանում այս տեղեկությունը։