ԵՐԵՎԱՆ, 17 մայիսի — Sputnik. Ազգությամբ հայ, քուրդ, հույն ու եզդի խաղաղ ցուցարարների վրա հարձակում են գործել ոչ միայն թուրքական ազգայնամոլ ուժերն, այլև Ռեջեփ Թայիփ Էրդողանի անվտանգության աշխատակիցները։ Այս կարծիքը Sputnik Արմենիայի հետ զրույցում հայտնեց քաղաքագետ Սուրեն Սարգսյանը։ Որպես ասվածի ապացույց` նա նշեց, որ ցուցարարների վրա հարձակվողների հագուկապը, պրոֆեսիոնալիզմը և ագրեսիվությունը հուշում էին, որ նրանք Թուրքիայի պետական պահպանության աշխատակիցներն էին։
«Ես անձամբ տեսնել եմ, թե ինչ մեծ շքախմբով է շրջում Թուրքիայի ղեկավարությունը։ Այդ մարդիկ Թուրքիայի հատուկ ծառայության ներկայացուցիչներ են»,-ասաց նա ։
Սուրեն Սարգսյանը գրեթե համոզված է, որ ցուցարարները սադրիչ գործողությունների չեն դիմել։
«Մեր ցուցարարները միշտ խաղաղ բնույթի ակցիաներ են իրականացրել։ Հետաքրքրական էր, որ հարձակմանը միջամտած ոստիկաններն անգամ չկարողացան պաշտպանել ցուցարարներին, քանի որ նրանց թիվն անհամեմատ ավելի քիչ էր»,-ասաց քաղաքագետը։
Նրա կանխատեսմամբ` շատ շուտով թուրքական կողմից հաղորդագրություն կլինի, որ դրանք Թուրքիայի նախագահի դեմ ուղղված գործողությունների պատասխանն էին։
The Washington Post-ի տեղեկություններով՝ բախումների հետևանքով ինը մարդ է վիրավորվել, նրանք տեղափոխվել են հիվանդանոց:
Ցույցը կազմակերպվել էր Ամերիկայի Հայ Դատի հանձնախմբի, Ամերիկայի Հելլենական խորհրդի և մի շարք քրդական և ասորական կազմակերպությունների կողմից։
