ԵՐԵՎԱՆ, 19 մայիսի — Sputnik. Շուրջ 30 տարվա ընթացքում Hermes տղամարդկանց շարքի կրեատիվ տնօրեն Վերոնիկ Նիշանյանը աստղաֆիզիկոսի համառությամբ ուսումնասիրում է այն, ինչ ֆրանսիական ապրանքանիշում «Տղամարդկանց տիեզերք» են կոչում, գրում է GQ ամսագիրը։
1976 թվականին Վերոնիկն ավարտել է Բարձր նորաձևության փարիզյան Սինդիկատին կից գործող դպրոցը և նույնիսկ պատկերացնել չէր կարող անգամ, որ արդյունքում ոչ թե շքեղ կուտյուրային զգեստներ է ստեղծելու, այլ բրդյա գործնական բաճկոններ և ալիգատորի կաշվից բլուզներ (2015/2016 աշուն-ձմեռ հավաքածուի գլխավոր հիթերից մեկը, որն աշխարհի բոլոր բուտիկներում հաշված րոպեների ընթացքում վաճառվել էր)։
Cerruti ապրանքանիշի հիմնադիր Նինո Չերուտին օգնական էր փնտրում այդ պահին։ Վերոնիկը մտածեց՝ ինչու չփորձել ուժերը և չզբաղվել տղամարդկանց նորաձևությամբ, չէ՞ որ դպրոցում նրան սովորեցրել են ճիշտ կարուձև անել և կտորների ընտրության հարցում հիմնարար մոտեցում ցուցաբերել։
12 տարվա ընթացքում ղեկավարի օգնականից նա դարձավ տղամարդկանց հավաքածուի լիիրավ համադիզայներ։ Եվ հենց այդ ժամանակ Ժան Լուի Դյուման, որը Hermès-ը հիմնադրած ընտանիքի արդեն երրորդ սերնդի ներկայացուցիչն էր, հրավիրեց Վերանիկին ղեկավարել տղամարդկանց ուղղությունը։ GQ ամսագիրը գրում է, որ հենց Նիշանյանը դարձավ այն մարդը, որը ճիշտ ուղղություն գտավ տղամարդկանց հավաքածուի համար։
