ԵՐԵՎԱՆ, 12 հունիսի — Sputnik. Կալիֆոռնիացի հայուհի Պեգի Սուլախյանը դարձել է Bravo հեռուստաալիքով հեռարձակվող «Օրինջ շրջանի իսկական տնային տնտեսուհիները» հայտնի ամերիկյան ռեալիթի շոուի ամառային սեզոնի աստղը:
«Պեգին ծնվել է Քուվեյթում, նրա ընտանիքը տեղափոխվել է Միացյալ Նահանգներ, երբ նա դեռ շատ փոքր էր»,- հայտնել է Սուլախյանը ամերիկյան հեռուստաալիքներին:
Bravo-ն բնութագրում է նրան որպես փորձառու տնային տնտեսուհու, բարձրաշխարհիկ հասարակության ներկայացուցչի, որն ամուսնացած է արդեն ավելի քան 20 տարի և երեք երեխա է դաստիարակում: Պեգիի ամուսնուն` Դիկո Սուլախյանին, անվանում են «անվային թագավոր», քանի որ նա իր հարստությունը կուտակել է լյուքս դասի ավտոմեքենաների համար անիվների վաճառքով: Հեռուստաշոուի նոր սեզոնում Պեգին կպատմի, թե ինչպես են ապրում ամերիկահայ հարուստ տնային տնտեսուհիները:
«Իսկական տնային տնտեսուհիները» ռեալիթի շոուի շարք է, որը պատմում է տարբեր նահանգների և քաղաքների ամերիկացի տնային տնտեսուհիների կյանքի մասին:
