ԵՐԵՎԱՆ, 28 հուլիսի – Sputnik. ԱՄՆ սենատն այսօր ընդունել է Ռուսաստանի, Իրանի և Հյուսիսային Կորեայի դեմ նոր պատժամիջոցներ կիրառելու օրինագիծը։ Այս մասին տեղեկացնում է ՌԻԱ Նովոստին։
Օրինագծին կողմ է քվեարկել 100 սենատորից 98–ը, միայն 2–ն են դեմ եղել դրա իրագործմանը։
Ավելի վաղ ԱՄՆ Կոնգրեսի ներկայացուցիչների պալատը ընդունել էր այս օրինագիծը ձայների ճնշող մեծամասնությամբ` 419` կողմ, 3` դեմ։
Օրինագիծը հիմա պիտի ուղարկվի նախագահ Դոնալդ Թրամփին` նրա հավանությանն արժանանալու համար։ Թրամփն իրավունք ունի վետո կիրառելու դրա վրա։ Նախագահի վետոն չեղյալ համարելու համար Կոնգրեսին հարկավոր է ամեն պալատի ձայների երկու երրորդը, որը, դատելով նախորդ քվեարկությունից Կոնգրեսին կհաջողվի հավաքել։
Սա Թրամփի կառավարման օրոք Կոնգրեսի կողմից Ռուսաստանի դեմ ընդունված առաջին կարևոր փաստաթուղթն է:
