ԵՐԵՎԱՆ, 2 օգոստոսի — Sputnik. «Եվրատեսիլ» երգի մրցույթի կազմակերպիչները փոխել են մրցույթի կարգը Ուկրաինայում տեղի ունեցածի պատճառով։ Հիշեցնենք, որ 2017 թվականին Ուկրաինայում կայացած երգի մրցույթին Ռուսաստանի ներկայացուցիչ Յուլիա Սամոյլովան չմասնակցեց, քանի որ Ուկրաինայի Անվտանգության ծառայությունն արգելել էր նրան մուտք գործել երկիր։
«Անկասկած, Կիևում «Եվրատեսիլ» մրցույթը «մթագնեցին» մի քանի անցանկալի միջադեպեր, որոնցից շատերը կարող էին հանգեցնել նրան, որ մրցույթը տեղափոխվեր ընդունող երկրի՝ Ուկրաինայի, սահմաններից դուրս։ Այդ պատճառով ստիպված էինք մի շարք փոփոխություններ և ուղղումներ մտցնել առաջիկա մրցույթների անցկացման կարգում», — ասվում է Եվրոպական հեռարձակողների միության (EBU) հաղորդագրության մեջ։
Ըստ նոր կանոնների՝ ազգային հեռարձակողները չեն կարող պատվիրակության մեջ ներառել այն անձանց, որոնց մուտքը «Եվրատեսիլն» ընդունող երկիր սահմանափակ է։
EBU-ն նաև իրավունք է վերապահում խափանումների դեպքում փոխանցել մրցույթը կազմակերպելու հնարավորությունը այլ հեռարձակողի։
Բացի այդ, «Եվրատեսիլի» կազմակերպիչները պահանջում են, որ կատարողներին գնահատող ժյուրիի անդամները լինեն բացարձակ անաչառ։
Ավելի վաղ, Ուկրաինայի Անվտանգության ծառայությունը Յուլիա Սամոյլովային արգելել էր մասնակցել մրցույթին` պատճառաբանելով, որ նա 2015 թվականին եղել է Ղրիմում։
Եվրոպայի հեռարձակողների միությունը փորձել էր կարգավորել հարցը և դատապարտել էր ուկրաինական իշխանությունների այդ քայլը, սակայն Կիևը որոշումը չէր փոխել։ Արդյունքում ռուսական «Առաջին ալիքը» հրաժարվեց «Եվրատեսիլ — 2017»-ի մասնակցությունից և հաղորդման հեռարձակումից։
Ընդ որում՝ EBU-ն տուգանել էր Ուկրաինայի Հանրային հեռուստառադիոընկերությանը։
