ԵՐԵՎԱՆ, 21 օգոստոսի — Sputnik. 158-ամյա հսկա ժամացույցը` Բիգ Բենն այսօր տեղական ժամանակով 12։00-ին վերջին անգամ կղողանջի։ Այս մասին դեռևս օգոստոսի 14-ին հայտարարել էին Համայնքների պալատում։
13,7 տոննա քաշով ամենախոշոր զանգը կանջատվի, դրանից հետո կսկսեն վերանորոգման աշխատանքներ կատարել։
Ինչպես գրում է ֆրանսիական «LE Figaro»-ն, 12 անգամ ղողանջելուց հետո Բիգ Բենը մինչև 2021 թվականը կլռի` չնայած երկրում մի շարք քաղաքական գործիչների անհամաձայնությանը, որոնք չեն համակերպվում այն մտքի հետ, որ լոնդոնյան ամենահայտնի խորհրդանիշի ձայնը չլսեն։
Այսօր հանրությանը հրավիրել են Բիգ Բենի ղողանջները վերջին անգամ լսելու։
Պլանավորվող աշխատանքների ընթացքում կավելացվի վերելակ որպես այլընտրանք 334 քայլի, որոնք պետք էր կատարել աշտարակի բարձունքը հաղթահարելու համար, իսկ ժամացույցը լուսավորող լույսերը կփոխարինվեն ավելի քիչ ծախսատար կամ էկոնոմ լույսերով։
