ԵՐԵՎԱՆ, 23 սեպտեմբերի — Sputnik. Չինաստանի ինժեներներին հաջողվել է վերափոխել խոշոր ինքնաթիռը և դարձնել աշխարհում առաջին բեռնատար ԱԹՍ-ն, որը կծառայի կոմերցիոն նպատակների համար։ Այդ մասին գրում է China Daily առցանց պարբերականը։
Նախագծում ներգրավված առաջատար դիզայները նշել է, որ Pacific Aerospace արտադրող ընկերության ստեղծած PAC P-750 XSTOL-ը մոդիֆիկացվել է և դարձել անօդաչու թռչող սարք, որն արդեն փորձարկում է անցնում։
«Ինքնաթիռն առաջին վայրէջքը կկատարի հոկտեմբերի սկզբին, եթե նախապատրաստական աշխատանքները բարեհաջող ավարտ ունենան։ Փորձարկումներից հետո այն կդառնա աշխարհում առաջին ԱԹՍ-ն, որը կօգտագործվի կոմերցիոն նպատակով», — ասել է Չինաստանի ավտոմատ կառավարման գիտահետազոտական ինստիտուտի անօդաչու թռչող սարքերի բաժնի տնօրեն Չեն Սյանը։
«Կոմերցիոն հրաշք-դրոն» ստեղծած մասնագետները նշել են, որ շուկայում դեռ չկան խոշոր տրանսպորտային թռչող սարքեր, իսկ բեռնափոխադրումները Չինաստանի ներսում իրականացվում են բեռնատար ավտոմեքենաներով կամ նավերով։
Ամբողջ խնդիրը, պարբերականի տվյալներով, այն է, որ ապրանքների մատակարարումը օդային տրանսպորտով լուրջ գումարներ արժե, իսկ Չինաստանում համապատասխան օդաչուների պակաս կա։
