ԵՐԵՎԱՆ, 27 սեպտեմբերի — Sputnik. Ադրբեջանի գլխավոր դատախազի տեղակալը սխալ է թույլ տվել փաստաթղթում, գրել է ռուս և իսրայելացի բլոգեր Ալեքսանդր Լապշինը LiveJournal–ի իր էջում։
«Ես հասկանում եմ, որ ադրբեջանցի քննիչներն ու դատախազները չափից դուրս շատ է տարվել բլոգեր Լապշինի «հանցագործությունների» հետաքննությամբ, դրա համար էլ վրիպակ են թույլ տվել: Սակայն, այսպես ասած, նրանց «վերականգնենք կուսությունը» աչք է ծակում: Սա դատախազությու՞ն է, թե՞ կուսության վերականգնման կլինիկա, հարցնում եմ ձեզ։ Բարդակ։ Բոլորին հեռացնել աշխատանքից` անձնական գործում համապատասխան նշում կատարելով», – գրել է Լապշինը։
Նա լուսանկարել է Ադրբեջանի գլխավոր դատախազի տեղակալի ստորագրած մեղադրական եզրակացության երկու էջերը։
Բացի այդ, նա ուշադրություն է դարձրել անգրագիտությանը, որը վրիպակ անվանել չի կարելի։
«Ցնցող անգրագիտություն. գիտեին էլ, որ բոլոր փաստաթղթերը հայտնվելու են համացանցում և դրանց հասարակական գնահատական է տրվելու: Հասկանում եմ, որ Ադրբեջանում ակտիվորեն արմատախիլ են անում ռուսերենը, սակայն չէ՞ր կարելի պաշտոնական փաստաթղթի համար մասնագետ գտնել: Կամ գոնե օգտվել բառարանից», – գրել է բլոգերը։
Հիշեցնենք`Լապշինը երեք տարվա ազատազրկման էր դատապարտվել առանց Ադրբեջանի իշխանության հետ համաձայնեցնելու Արցախ այցելելու համար։ Ադրբեջանի նախագահի հրամանով նրան ներում էր շնորհվել սեպտեմբերի 11-ին ։
2016 թվականի վերջին Լապշինը Մինսկում ձերբակալվել էր Ադրբեջանի հարցման համաձայն, որը նրան «սև ցուցակի» մեջ էր ընդգրկել առանց Բաքվի համաձայնության Արցախի Հանրապետություն այցելելու պատճառով: Բելառուսի գլխավոր դատախազությունը որոշում էր ընդունել Ադրբեջանի հարցումը բավարարելու և Լապշինին հանձնելու մասին:
