ԵՐԵՎԱՆ, 5 դեկտեմբերի — Sputnik. Ուկրաինայի իրավապահները գնացել էին խուզարկելու Վրաստանի նախկին նախագահ Միխեիլ Սաակաշվիլու կիևյան բնակարանը։
Նման վերաբերմունքից վրդովված Սաակաշվիլին իր բողոքն արտահայտել է տանիքին` սպառնալով նետվել այնտեղից, հայտնում է ՌԻԱ Նովոստին` հղում անելով «1+1» ուկրաինական հեռուստաալիքին։
Սաակաշվիլու համախոհներից մեկը` Դավիթ Սաքվարելիձեն, հայտնել է, որ «անհայտ անձինք» կոտրում են նրա բնակարանի դռները։
«Այժմ Սաակաշվիլին տանիքի վրա է և բանակցություններ է վարում ենթադրյալ իրավապահների հետ։ Աղմուկ է լսվում։ Քաղաքական գործիչն ասում է, որ եթե նրան դիպչեն, տանիքից կնետվի։ Փրկարարներն ու բժիշկներն են ժամանել։ Վրաստանի նախկին նախագահի համախոհներից մեկին հիվանդանոց են տեղափոխել, իբր նա ձեռքի և ոտքի կոտրվածք է ստացել», — հայտնում են ուկրաինական ԶԼՄ-ներն` ավելացնելով, որ Սաակաշվիլուն փորձել են ձերբակալել։
Սեպտեմբերին Սաակաշվիլին զրկվել էր Ուկրաինայի քաղաքացիությունից։ Հետագայում նա իր համախոհների աջակցությամբ ճեղքել էր Լեհաստանի սահմանապահների պատնեշը։ Սահմանն ապօրինի հատելու համար դատարանը նրան տուգանել էր 130 դոլարով։
Վրաստանում Սաակաշվիլին մեղադրվում է մի քանի հանցագործությունների մեջ։ Երկիրը նա լքել է 2013 թվականի նոյեմբերին, երբ նախագահի պաշտոնը ստանձնել է Գեորգի Մարգելաշվիլին։
Ավելի վաղ տեղեկություն էր տարածվել, որ Ուկրաինայի իշխանությունը մտադիր է մինչև տարեվերջ Սաակաշվիլուն արտաքսել երկրից։ Սաակաշվիլին անհնար է համարում այդ արտաքսումը։
