ԵՐԵՎԱՆ, 10 փետրվարի — Sputnik, Լաուրա Սարգսյան. Վրաստանում Պետրոս Ադամյանի անվան պետական դրամատիկական թատրոնը քանդելու մասին լուրերը չափազանցված են։ Ավելին` շինարարական աշխատանքների ֆինանսավորումն ամբողջովին ստանձնել է Վրաստանի նախկին վարչապետ Բիձինա Իվանիշվիլին։ Այս մասին Sputnik Արմենիայի հետ զրույցում ասաց թատրոնի գեղարվեստական ղեկավար Արմեն Բայանդուրյանը։
Վերջին ժամանակաշրջանում սոցիալական ցանցերում քննարկում են, որ թբիլիսահայերի մշակութային գլխավոր օջախը քանդելու են։ Այս լուրը վրդովմունքի ալիք է բարձրացրել։ Շատերը վստահ են, որ քանդելուց հետո որևէ մեկը նոր շենք չի կառուցի։
«Այդպես կարող են մտածել ու խոսել հայ և վրացի ժողովուրդների թշնամիները։ Վերականգնման աշխատանքների ժամանակ մեծ ճեղքեր են հայտնաբերվել։ Որոշ դեպքերում դրանք վերականգնել հնարավոր չէ»,- ասաց Բայանդուրյանը։
Նրա խոսքով` ինչ-որ մեկը փորձում է գժտեցնել հայ և վրացի ժողովուրդներին։ Բայանդուրյանն ընդգծեց` թատրոնը կվերականգնվի, և այդ հարցը կլուծվի բարերարի` Վրաստանի նախկին վարչապետի շնորհիվ։ Թբիլիսահայերը շատ շնորհակալ են նրան։
Նշենք, որ Իվանիշվիլին առաջին անգամ չէ, որ օգնում է Վրաստանի հայ համայնքին։ Նա նաև իր ավանդն ունի Թբիլիսիի Սուրբ Գևորգ եկեղեցու վերականգնման գործում։
«Եթե շենքը քանդելու և դրա փոխարեն նորը կառուցելու անհրաժեշտություն լինի, ես և թատերախումբը կսատարենք այդ որոշումը։ Մեծ ճեղքերն ու թուլացած հիմքը վտանգավոր են։ Երաշխիք չկա, որ մի քանի տարի անց շենքը նորից ոչ պիտանի չի դառնա»,- ասաց Բայանդուրյանը։
Թատրոնի վերականգնման աշխատանքները մեկնարկել են 2018 թվականի օգոստոսին։ Արդիականացված շենքն,ամենայն հավանականությամբ, պատրաստ կլինի 2019 թվականի ավարտին։ Եթե բոլոր աշխատանքներն իրականացվեն նախատեսված պլանով, հայկական թատրոնը լավագույններից մեկը կլինի Վրաստանում։
«Եթե մեր շենքը դեռ չունենք, չի նշանակում, որ չենք աշխատում։ Վերջին յոթ տարում շենքի բացակայության պայմաններում մենք 249 ներկայացում ենք ունեցել, որոնցից 26-ը` նոր»,- Բայանդուրյանը։
Թատերախումբը հյուրախաղերով եղել է Հայաստանում, Ֆրանսիայում, Հունաստանում, Ռուսաստանում։ Դերասանները պարբերաբար խաղում են նաև Ռուսթավելի, Մարջինաժվիլի թատրոնների բեմերում։
Բայանդուրյանն ընդգծեց, որ ինքը 20 տարի է` թատրոնի գեղարվեստական ղեկավարն է և այդ ընթացքում որևէ վատ բան չի տեսել վրացական իշխանությունից։ Նրանք հայկական թատրոնին վերաբերվում են այնպես, ինչպես վրացականին։
Հայկական թատրոնի շենքը կառուցվել է 1936 թվականին։
