ԵՐԵՎԱՆ, 19 փետրվարի — Sputnik. Կիևում ազատել են մի քանի օր առաջ առևանգված հայ գործարար Սուրեն Մամոյանին։
Չարագործները փետրվարի 6-ին առևանգել էին Կիևի գործարարին և տարել անհայտ ուղղությամբ։
Երկու ավտոմեքենաները, որոնցով իրականացվել էր հանցագործությունը, այրել էին հանցանշանները վերացնելու համար։
Հետագայում հանցագործները կապ էին հաստատել գործարարի բարեկամների հետ և 500 հազար դոլար փրկագին պահանջել, հայտնում է «Լևի բերեգը»։
Հատուկ գործողությունների արդյունքում փետրվարի 17-ին գործարարին հաջողվել է ազատել, իսկ ենթադրյալ հանցագործներին` կալանավորել։ Հայտնի է, որ Մամոյանը Ուկրաինայի քաղաքացի է։
Նշենք, որ վերջին մեկ ամսվա ընթացքում սա հայերի առևանգման երկրորդ դեպքն է Կիևում։ 2017 թվականի նոյեմբերի վերջին հայկական ԶԼՄ-ներում տեղեկություն էր հայտնվել, որ առևանգել են գործարար Սերգեյ Մանուկյանի որդուն` Արմանին։ Նրան բաց էին թողել այս տարվա հունվարին։