ԵՐԵՎԱՆ, 23 փետրվարի — Sputnik, Արամ Գարեգինյան. Ֆրանսահայ գործարար Ժոզեֆ Ուգուրլյանը գնել է «Պադուա» իտալական ֆուտբոլային ակումբի բաժնետոմսերի 20%-ը, հայտնում է Il Mattino di Padova պարբերականը։
Պադուացիները լավագույն ժամանակներ ունեցել են, բայց 1996 թվականին հրաժեշտ են տվել А սերիային և այժմ խաղում են երրորդ լիգայում։
Նրանց պատանեկան թիմում ժամանակին իր կարիերան էր սկսում Ալեսանդրո Դել Պիեռոն։ Մեծերի թիմում 90-ականների սկզբին խաղում էր Դեմետրիո Ալբերտինին, իսկ 2000-ականների վերջին (երբ ակումբը դիրքերը հազիվ պահպանեց B սերիայում)` Մատեո Դարմիանը, որին վարձակալության էին վերցրել «Միլանից»։
46-ամյա Ժոզեֆ Ուգուրլյանը մամուլի ասուլիսին պատրաստված էր եկել. և՛ նա, և՛ նրա ընտանիքը` կինը, երկու որդիները և դուստրը, լրագրողներին ներկայացան ակումբի գույներով` կարմիր և սպիտակ վզակապներով։ Լրագրողներին նա ողջունեց մաքուր իտալերենով։
«Պադուան» Ուգուրլյանի ֆուտբոլային երրորդ «սերն է». տանը` Ֆրանսիայում, նա գնել է «Լանս» ակումբի (որն այժմ երկրորդ լիգայում է հանդես գալիս) բաժնետոմսերի վերահսկիչ փաթեթը։ Իսկ Կոլումբիայում նա Millionarios Cuadro Azul ակումբի բաժնետոմսերի սեփականատերն է։ Այս մեկն արդեն բարձրագույն լիգայում է խաղում։
Ինչո՞ւ է պարոն Ժոզեֆն այդքան հետաքրքրված ֆուտբոլով։ Այն միակ մարզաձևն է, որտեղ ոչ թե փողն է ամեն ինչ որոշում, այլ թիմային ոգին, համոզված է նա։
«Պադուայում» Ուգուրլյանը որոշել է ներդրում կատարել ակումբի նախագահ Ռոբերտո Բոնետոյի հետ հանդիպումից հետո։ Իտալացին հային գրավել է ակումբի և քաղաքի հանդեպ նվիրվածությամբ։
«Նա իր համար աշխատավարձ դուրս չի գրում։ Հակառակը, անձամբ է փորձում ակումբի բյուջեն ավելացնել։ Հանուն այն քաղաքի, որ ներկայացնում է», — հայտնեց Ուգուրլյանը։
Արդյո՞ք նա կշարունակի ակումբում ներդրում անել։ Ցույց կտա ժամանակը։
«Երբ ժամանակը գա, կքննարկենք` կարո՞ղ է թիմը բարձրանալ B սերիա, և արդյո՞ք ավելի շատ գումար կպահանջվի այն ամրապնդելու համար։ Սակայն մենք հույս ունենք, որ դա տեղի կունենա։ Չէ՞ որ պետք է տեղի ունենա», — ժպտում է գործարարը։
Այդ հարցում, ըստ նրա, կօգնի իր ազգանունը (ugur թուրքերեն նշանակում է «հաջողություն»)։
Նրան դուր է գալիս նաև Վենետիկի մերձակայքում գտնվող Պադուան։
«Մենք` հայերս, կապված ենք Պադուայի հետ։ Այստեղ է ապրում գրող Անտոնիա Արսլանը, «Արտույտների ագարակը» հիանալի գրքի հեղինակը։ Նաև հայկական համայնք կա։ Այնպես որ, այստեղ կարծես տանը լինեմ», — ուրախանում է պարոն Ուգուրլյանը։
