ԵՐԵՎԱՆ, 26 փետրվարի — Sputnik. Բլոգերներ Ալեքսանդր Լապշինը, Ալեքսանդր Ալիմովը, Ստանիսլավ Գորբունովը և Թոմաս Բիկելիսը բողոքի ակցիա են անցկացրել Վիլնյուսում Բելառուսի դեսպանատան դիմաց` պահանջելով բանտից ազատ արձակել անօրինական կերպով դատապարտված ընկերներին։
«Կես տարի է անցել ադրբեջանական բանտից իմ դուրս գալուց հետո, բայց երկու բան է խանգարում ինձ վերադառնալ կյանքի սովորական ռիթմին։ Դա Ալիևի և Լուկաշենկոյի մարդակերական ռեժիմները համեստ ուժերի ներածին չափով պատժելու ցանկությունն է։ Երկրորդ, ես անհանգստանում եմ իմ ընկերների կյանքի համար, որոնք անօրինական կերպով դատապարտվել են և կտրվել իրենց ընտանիքներից ու հայտնվել նշված պետությունների բանտերում», — գրել է Լապշինը Facebook-ում։
Նրա խոսքով` բելառուսական բանտում անօրինական կերպով նստած են բրիտանացի գործարար Ալան Սմիթը, ճապոնացի նկարիչ Դաիչի Յոշիդան և բելառուս գավառագետ Ալես Յուրկոյտը։
«Մինչ մենք ձեզ հետ զվարճանում ենք մոնիտորների դիմաց և տանը` մեր ընտանիքների հետ, այդ մարդիկ Վիտեբսկի թիվ 3 գաղութում ապրում են անմարդկային պայմաններում։ Ծաղր ու ծանակ, բանտարկյալների հիմնարար իրավունքների խախտումներ, սպառնալիքներ, շանտաժ, հոգեբանական ճնշում և կտտանքներ։ Այդ ամենը վատ սննդի, պատշաճ բժշկական սպասարկման բացակայության և մենախցերի ու բարաքների գերծանրաբեռնվածության ֆոնին», — գրել է Լապշինը։
Լապշինն իր բլոգում գրել է` գաղտնիք չէ, որ Բելառուսի նախագահ Լուկաշենկոն ինձ համար սակարկել է Ռուսաստանի և Իսրայելի հետ` առաջարկելով չհանձնել Ադրբեջանին այս կամ այն առավելության դիմաց։
«Մինսկի քննչական մեկուսարանում ինձ հետ տարբեր մարդիկ էին նստած։ Դժբախտ նկարիչ Դաիչի Յոշիդուի մասին ես ավելի վաղ պատմել եմ։ Տղան բանտում մահանում է և գրեթե 3 տարի դեռ պետք է նստի։ Նմանատիպ իրավիճակ է բրիտանացի Ալան Սմիթի հետ, որը 2 տարվա ազատազրկման դատապարտվել է իբր անօրինական ներգաղթ կազմակերպելու համար։ Բացարձակ անապացույց մեղադրանքներ, որոնց նախորդել է քննիչների կողմից փող շորթելը», — գրել է Լապշինը։
Նրա խոսքով` հետո պատմություն է եղել ֆրանսիացի զբոսաշրջիկ Ժոլան Վիյոյի հետ, որը երեք ամիս անցկացրել է Գոմելի բանտում. նրա ուսապարկում հուշանվեր-փամփուշտ են գտել։ Զբոսաշրջիկն անձամբ մոտեցել և հարցրել է բելառուս մաքսայիններին` այդ իրը հայտագրելու կարիք կա՞։ Եվ տեղում ձերբակալվել է։
Նա նշել է, որ այստեղ էլ է Լուկաշենկոն սակարկել, այս անգամ Եվրամիության կողմից պատժամիջոցների թեմայով։ Շուտով Ժոլանին ազատ են արձակել։
«Ալես Յուրկոյտն իմ մեկ այլ ընկերն է և բանտակիցը Մինսկի բանտից։ Լավագույն մարդկանցից մեկը, որին ճանաչել եմ իմ կյանքում։ Հայրենասեր և պարզապես խելացի ու կիրթ մարդ։ Նրա մեղքն այն է եղել, որ հրաժարվել է սուտ վկայություն տալ իր գործընկերների դեմ։ Դրանից հետո նրան մեղադրել են կաշառք վերցնելու մեջ բացառապես նրա ծառայակցի ցուցմունքների հիման վրա, որը դատարանում բառացիորեն ասել է. «Կարծում եմ, որ Յուրկոյտը վերցրել է, չէ՞ որ մենք բոլորս վերցրել ենք»», — նշել է բլոգերը։
Նա հաղորդում է, որ Ալեսը չի ընդունել իր մեղքը և դրա հետ կապված ոչ մի ապացույց չի եղել և չի կարող լինել։ Լապշինի կարծիքով` Յուրկոյտը 7 տարվա ազատազրկման է դատապարտվել միայն այն պատճառով, որ «իրեն սրիկայի պես չի պահել»։
2016թ-ի դեկտեմբերի 19-ին նրա ընկերները Լատվիայից և Լիտվայից բողոքի ակցիա են կազմակերպել Վիլնյուսում Բելառուսի դեսպանատան առջև` պահանջելով ազատ արձակել Լապշինին։
