ԵՐԵՎԱՆ, 5 ապրիլի — Sputnik. Սիրիայում հայկական դեսպանատունն ու հյուպատոսությունը չեն փակվել նույնիսկ Հալեպի համար դժվար ժամանակաշրջանում, Sputnik Արմենիա մամուլի կենտրոնում ասաց ռազմական լրագրող և «Ռոսիա 24» հեռուստաալիքի հաղորդավար Անտան Ստեպանենկոն։
Լրագրողը մի քանի անգամ եղել է թեժ կետերում, հատուկ ռեպորտաժներ պատրաստել Սիրիայի Արաբական Հանրապետությունից։
«Ինչ վերաբերում է հայ համայնքին, ես նկարահանումներ էին իրականացնում Հալեպի քրիստոնյա և հայկական թաղամասերում, որտեղ իրավիճակը բավականին կայուն է։ Վերջին մեկ-մեկուկես տարվա ընթացքում հայկական համայնքն առանձնակի խնդիրներ չունի», — նշեց լրագրողը։
Նա հակամարտության գոտում լինելու ժամանակ զրուցել է Սիրիայում Հայաստանի դեսպանի (Արշակ Փոլադյանի) հետ և սեփական աչքերով տեսել, որ հայ դիվանագետներն աշխատում էին միշտ, նույնիսկ ամենածանր պահերին։
«Օպերատորս հայ է (Արտյոմ Գրիգորյան), և նա ամենուր հայրենակիցներ էր փնտրում, գտնում էր և՛ սպաների շրջանում, և՛ զինվորների։ Հայկական համայնքը լիովին սիրիական բանակի կողմից է։ Դա նորմալ է ցանկացած մարդու համար, որը այս կամ այն երկրի քաղաքացի է», — նշեց նա։
Ստեպանենկոյի խոսքով` մեր հայրենակիցներն ակտիվ մարտնչում են նաև Սիրիայում։
Ստեպանենկոն նաև պատասխանել է այն հարցին, թե ինչպես են Սիրիայում վերաբերվում ռուս զինվորականներին, մասնավորապես` հայ համայնքի ներկայացուցիչները։
«Երբ ռուսական զորքը դեռ չէր մտել Սիրիա, ռուս լրագրողները միակն էին, բացի դիվանագետներից, որոնց տեսել և որոնց հետ շփվել են հասարակ սիրիացիները։ Վերաբերմունքը դրական էր, քանի որ նրանք ի դեմս Ռուսաստանի տեսնում էին այն ուժը, այն երկիրը, որից կարելի է օգնություն սպասել», — ասաց Ստեպանենկոն` ավելացնելով, որ 2013-2014 թվականներին, երբ սիրիական բանակը մարտական գործողություններ էր վարում ծայրահեղականների դեմ, տարբեր տրամադրություններ կային։
Ռուսական զորքի հայտնվելուց հետո տրամադրությունը փոխվեց նաև սիրիական բանակում. մարդիկ հասկացան, որ մենակ չեն, նրանց իրական օգնություն են ցուցաբերում։
Ինչպես զինվորները, այնպես էլ խաղաղ բնակիչներն այսօր բարձր տրամադրվածություն ունեն, նրանք զգացին հաղթանակի համը, հասկացան, որ կարող են և գիտեն հաղթել, ավելացրեց Ստեպանենկոն։
Հիշեցնենք, որ 2015 թվականի սեպտեմբերի 30-ին, սիրիական իշխանության պաշտոնական դիմումի համաձայն, Ռուսաստանի ՕՏՈՒ-ն Սիրիայում ռազմական գործողություն սկսեց ահաբեկչական խմբավորումների դեմ։ Հակաահաբեկչական գործողությունները շարունակվում էին մինչև 2017 թվականի դեկտեմբեր։
Պաշտոնական տվյալների համաձայն` գործողությունների անցկացմանն ավելի քան 48 հազար զինվոր և սպա են մասնակցել։ Ներկա պահին Սիրիայի տարածքում է ռուսական ՕՏՈՒ ավիախումբը, որը տեղակայված է Հմեյմիմում։ Սիրիայի Տարտուս քաղաքում տեղակայված է Ռուսաստանի ռազմածովային նավատորմի նյութատեխնիկական ապահովման կետը։
