ԵՐԵՎԱՆ, 6 հունիսի — Sputnik. Դոնալդ Թրամփը ներում է շնորհել 67-ամյա աֆրոամերիկացի Էլիս Մարի Ջոնսոնին, որին ցմահ ազատազրկման էին դատապարտել թմրանյութերի վաճառքի համար, հայտնում է CNN-ը։
Հեռուստաալիքի տվյալներով` Ջոնսոնին շուտով պետք է ազատ արձակեն։
Անցյալ շաբաթ Էլիս Ջոնսոնի գործը մեծ աղմուկ էր բարձրացրել ամերիկահայ հեռուստաաստղ Քիմ Քարդաշյանի պատճառով։ Նա հանդիպել էր ոչ միայն Թրամփի, այլև նրա փեսայի` Ջարեդ Քուշների հետ: Քիմը խնդրել է ազատ արձակել Էլիս Մարի Ջոնսոնին։
Ավելի ուշ Թրամփը պատմել էր Քարդաշյանի հետ հանդիպման մասին` համատեղ լուսանկար հրապարակելով Instagram-ի իր էջում։
Քիմն Էլիսին ազատ արձակելը «ամենալավ նորություն» է անվանել։ Twitter-ի իր էջում նա հայտնել է, որ արդեն հեռախոսազրույց է ունեցել Էլիսի հետ։
«Նրա հետ զրույցը կյանքիս ամենաերջանիկ հիշողություններից մեկն է լինելու։ Ինձանից իմանալով իր ազատման մասին` նա երջանկությունից բղավում էր, երկուսով լալիս էինք։ Այդ պահը երբեք չեմ մոռանա», — գրել է Քիմը։
The phone call I just had with Alice will forever be one of my best memories. Telling her for the first time and hearing her screams while crying together is a moment I will never forget.
— Kim Kardashian West (@KimKardashian) 6 июня 2018 г.
Ջոնսոնին ցմահ ազատազրկման են դատապարտել 1996 թվականին կոկաինի վաճառքով զբաղվող հանցավոր խմբավորմանը մասնակցելու համար։ Նրան դատապարտել էին փողերի լվացման համար։
Սպիտակ տունը հայտարարել է, որ նա օրինակելի բանտարկյալ է և քրտնաջան աշխատել է իր համբավը վերականգնելու համար։
