ԵՐԵՎԱՆ, 10 հուլիսի — Sputnik. Թաիլանդում հեղեղված քարանձավից երեխաների տարհանման երրորդ փուլը սկսվել է։ Այս մասին փրկարարական գործողության մամուլի կենտրոնում ճեպազրույցի ընթացքում հայտնել է միացյալ շտաբի պետ Նարոնգսակ Օսոտխանակոնը, տեղեկացնում է ՌԻԱ Նովոստին։
Երեխաներին հանելու աշխատանքը վերսկսվել է տեղական ժամանակով 10:08–ին (երևանյան ժամով 08:08–ին)։ Փրկարարները հույս ունեն տարհանել մնացած հինգ մարդուն` չորս երեխաներին ու մարզչին։
Նաև նախատեսվում է դուրս բորել չորս զինծառայողին և բժիշկներին, որոնք երեխաների հայտնաբերման պահից նրանց կողքին են եղել։
Ամերիկացի գործարար Իլոն Մասկը, որը ղեկավարում է SpaceX և Tesla ընկերությունները, հայտնել է Twitter–ում, որ նրա մինի սուզանավը, որը նա առաջարկել է օգտագործել երեխաներին փրկելու համար, պատրաստ է շահագործման։
«Հենց նոր վերադարձա համար երեք քարանձավից։ Մինի սուզանավը պատրաստ է, եթե պետք լինի։ Այն հրթիռների մասերից է պատրաստված ու կոչվում է «Անտառային վարազ»` երեխաների ֆուտբոլային թիմի պատվին։ Թողում եմ այն այստեղ, որ օգտագործեն, եթե ապագայում պետք գա։ Թաիլանդն այնքան գեղեցիկ է», – գրել է Մասկը։
Հիշեցնենք, որ մարզիչն ու 12 դեռահասները փակված են մնացել Թաիլանդի Կհաո Լուանգ քարանձավում դեռ հունիսի 23-ից։ Երեխաներին հայտնաբերել է ջրասուզակներից մեկը։ Իրավիճակը բարդանում է անդադար լցվող ջրի և թթվածնի պակասի պատճառով։
