ԵՐԵՎԱՆ, 13 օգոստոսի — Sputnik. Հնդկաստանի 7 նահանգներում մուսոնային անձրևների սեզոնը ավելի քան 770 մարդու մահվան պատճառ է դարձել։ Այս մասին հայտնում է ՌՒԱ Նովոստին։
Տվյալների համաձայն` աղետի պատճառով ամենից շատ տուժել է հարավային Կերալ նահանգը, այնտեղ աղետի հարվածից 187 մարդ է մահացել։ Հաջորդը ցուցակում Ուտար Պրադեշ նահանգն է (171 մարդ), ապա Արևմտյան Բենգալիան (170 մարդ), ինչպես նաև Մախարաշտրան (139 մարդ)։
Տվյալներ կան նաև զոհվածների մասին. Գուջարաթ (52 մարդ), Ասսամ (45 մարդ) և Նագալենդ (8 մարդ)։ Նշվում է, որ 6 նահանգներում մոտ 250 մարդ վնասվածք է ստացել առատ տեղումների պատճառով տեղի ունեցած միջադեպերի հետևանքով։ Ավելի քան 30 մարդ անհետ կորած են համարվում։
Ներկա պահին հնդկական բանակը, ՌԾՈՒ–ն, ՌՕՈՒ–ն, առափնյա անվտանգությունը և Բնական աղետների նկատմամբ արձագանքման ազգային ուժերը (NDRF) համատեղ գործողություններ են իրականացնում երկրի տարբեր շրջաններում քաղաքացիներին փրկելու ուղղությամբ։
